കണ്ണൂർ : കണ്ണൂരിൽ പോലീസിന്റെ സഹായത്തോടെ ഇന്നും കെ റെയിൽ സർവ്വേ തുടരുമെന്ന് ഉദ്യോഗസ്ഥർ. ചാല മുതൽ തലശ്ശേരി വരെയുള്ള കല്ലിടലാണ് ഇനി ബാക്കിയുള്ളത്. രാവിലെ പത്ത് മണിയോടെ നടപടികൾ ആരംഭിക്കുമെന്ന് ഉദ്യോഗസ്ഥർ അറിയിച്ചു. എന്നാൽ ഇന്നും ഇവരെ തടയാൻ ഒരുങ്ങുകയാണ് നാട്ടുകാർ. കെ റെയിൽ കല്ലിടലിനെതിരെ സമരം ശക്തമാക്കുമെന്ന് നാട്ടുകാർ പറഞ്ഞു. ഇന്നലെ നാട്ടിയ കല്ലുകൾ യൂത്ത് കോൺഗ്രസ് പ്രവർത്തകർ പിഴുതുമാറ്റിയ ശേഷം റീത്ത് വെച്ചിരുന്നു.
പാർട്ടി കോൺഗ്രസ് കാലത്ത് നിർത്തിവെച്ച സിൽവർ ലൈൻ സർവ്വേ ഇന്നലെയാണ് ആരംഭിച്ചത്. ചാലയിൽ കെ റെയിൽ കുറ്റികളുമായെത്തിയ വാഹനം നാട്ടുകാർ തടഞ്ഞു. ഉദ്യോഗസ്ഥർ നാട്ടിയ കുറ്റികൾ നിമിഷങ്ങൾക്കകമാണ് നാട്ടുകാർ പിഴുത് മാറ്റിയത്.
തിരുവനന്തപുരം കഴക്കൂട്ടം കരിയാച്ചിറയിലും കെ റെയിൽ കല്ലിടലിനെതിരെ വൻ പ്രതിഷേധം നടന്നു. പ്രതിഷേധക്കാരെ പോലീസ് കയ്യേറ്റം ചെയ്യുകയും ബൂട്ടിട്ട് ചവിട്ടുകയും ചെയ്ത സംഭവം വൻ വിമർശനങ്ങൾക്കും പ്രക്ഷോഭങ്ങൾക്കും വഴിവെച്ചിരുന്നു. പ്രതിഷേധം കനത്തതോടെ കല്ലിടൽ നിർത്തിവെക്കുകയായിരുന്നു.
