ജയ്പൂർ : രാജസ്ഥാനിൽ 12 ാം ക്ലാസ് പരീക്ഷയ്ക്ക് ചോദിച്ചത് കോൺഗ്രസിന്റെ ഭരണനേട്ടങ്ങൾ. 12 ാം ക്ലാസ് പൊളിറ്റിക്കൽ സയൻസ് പരീക്ഷയ്ക്കാണ് കോൺഗ്രസ് ചരിത്രത്തെ പ്രകീർത്തിച്ച് പറയുന്ന ആറ് ചോദ്യങ്ങൾ ചോദിച്ചത്. സംഭവത്തിൽ കേന്ദ്ര വിദ്യാഭ്യാസ മന്ത്രാലയം രാജസ്ഥാൻ വിദ്യാഭ്യാസ വകുപ്പിനോട് വിശദീകരണം തേടി.
കോൺഗ്രസ് ഭരണ സംസ്ഥാനത്ത് പാർട്ടിയുടെ നേട്ടങ്ങൾ തന്നെയാണ് ചോദ്യപേപ്പറിൽ ഉൾപ്പെടുത്തിയത്. ഇത് വൻ വിവാദങ്ങൾക്ക് വഴിവെക്കുകയായിരുന്നു. ചോദ്യപേപ്പറുകളെ സംബന്ധിച്ച് മാദ്ധ്യമങ്ങളിൽ ആരോപണങ്ങൾ ഉയരുന്നുണ്ടെന്നും ഇത് സംബന്ധിച്ച് സംസ്ഥാന സർക്കാരിന്റെ അഭിപ്രായം അറിയിക്കണമെന്നും കേന്ദ്ര വിദ്യാഭ്യസ വകുപ്പ് അറിയിച്ചു. ഇതിന് പിന്നാലെ രൂക്ഷ വിമർശനവുമായി ബിജെപി രംഗത്തെത്തി.
ചോദ്യപേപ്പർ പൊളിറ്റിക്കൽ സയൻസിന്റേതായിരുന്നോ അതോ കോൺഗ്രസ് ചരിത്രത്തിന്റേതായിരുന്നോ എന്ന് ബിജെപി സംസ്ഥാന ഘടകം ചോദിച്ചു. മുഖ്യമന്ത്രി അശോക് ഗെഹലോട്ടിനെയും ബിജെപി രൂക്ഷമായി വിമർശിച്ചു. കോൺഗ്രസ് ചരിത്രത്തിന്റെ ഭാഗമാണെന്ന് ഗെഹ്ലോട്ട് വിചാരിച്ചിരിക്കാം എന്നും ബിജെപി പരിഹസിച്ചു.
