ഫുട്ബോളിലെ മിശിഹ ലയണൽ മെസിയുടെ വീടിന് മുകളിലൂടെ വിമാനം പോലും പറക്കില്ല…. തളളിയതല്ല… സത്യമാണ്… എന്തുകൊണ്ടാണ് മെസിയുടെ വീടിന് മുകളിലൂടെ മാത്രം ഈ നിയന്ത്രണം ? ഈ ചോദ്യത്തിന് ഉത്തരം തേടിയിറങ്ങിയവർ നിരവധിയാണ്…മെസിയുടെ വീടിരിക്കുന്നതു കൊണ്ടാണോ ഈ വിലക്കെന്ന ചോദ്യം സമൂഹമാദ്ധ്യമങ്ങളിലുൾപ്പെടെ ആളുകൾ ഇപ്പോഴും നിരന്തരം ചോദിക്കുന്നുണ്ട്…. വാസ്തവത്തിൽ എന്താണ് ഇതിന് കാരണം… നമുക്ക് മെസിയുടെ വീടിരിക്കുന്നിടം വരെ ഒന്ന് പോയി വരാം
അപകട സാദ്ധ്യത കണക്കിലെടുത്താണ് മെസിയുടെ വീടിന് മുകളിലൂടെ വിമാനം അനുവദിക്കാത്തതെന്നാണ് ഭൂരിഭാഗം പേരുടെയും ധാരണ. വീടിന് മുകളിലൂടെ പറക്കുന്നതിനിടെ വിമാനം തകരുകയോ മറ്റോ ചെയ്താൽ അത് മെസിയ്ക്കും അപകടം ഉണ്ടാക്കും. ഇതാണ് അധികൃതർ ഇതുവഴിയുള്ള വിമാന യാത്രയ്ക്ക് അനുമതി കൊടുക്കാത്തത് എന്നാണ് വ്യാപക പ്രചാരണം. എന്നാൽ സത്യം ഇതല്ല.
ബാഴ്സലോണയിലെ ഗാവ മേഖലയിലാണ് ലയണൽ മെസിയുടേയും കുടുംബത്തിന്റെയും താമസം. 30.76 ചതുരശ്ര കിലോമീറ്ററിൽ വ്യാപിച്ചു കിടക്കുന്ന ഈ മേഖല പരിസ്ഥിതി സംരക്ഷിത മേഖലകളിൽ ഒന്നാണ്. ഇക്കാരണത്താലാണ് ലയണൽ മെസിയുടേത് ഉൾപ്പെടെയുള്ള വീടുകൾക്ക് മുകളിലൂടെ വിമാനങ്ങൾ പറക്കാത്തത്. വിമാനത്താവളത്തിൽ നിന്നും 10 മൈൽ അകലെയാണ് മെസിയുടെ വീട് സ്ഥിതിചെയ്യുന്നത്.
ഒരിക്കൽ ഒരു അഭിമുഖത്തിനിടെ വിമാനക്കമ്പനിയായ വ്യൂലിംഗിന്റെ മേധാവി മെസിയുടെ വീടിന് മുകളിലൂടെ വിമാനം പറത്തില്ലെന്ന് വ്യക്തമാക്കിയിരുന്നു. ഇതോടെയാണ് എന്തു കൊണ്ടാണ് മെസിയുടെ വീടിന് മുകളിൽ വിമാനം പറക്കാത്തത് എന്ന ചോദ്യം ആളുകൾക്കിടയിൽ ഉയർന്നു വന്നത്. ലോകത്ത് ഒരിടത്തും നടക്കാത്ത വിചിത്രമായ കാര്യമാണെന്നായിരുന്നു ആളുകൾ പറഞ്ഞത്. ഇതുമായി ബന്ധപ്പെട്ട ചർച്ചകൾ കൊഴുക്കുന്നതിനിടെ കാരണം വ്യക്തമാക്കി അദ്ദേഹം തന്നെ രംഗത്ത് വന്നു. ഇതോടെയാണ് ആളുകളുടെ സംശയത്തിന് ഉത്തരം ലഭിച്ചത്.
നിരവധി വനങ്ങളും, ജന്തു ജീവജാലങ്ങൾ കൊണ്ടും സമ്പുഷ്ടമാണ് ഗാവ മേഖല. വംശനാശ ഭീഷണി നേരിടുന്ന ആയിരത്തിലധികം സസ്യങ്ങളും ജീവജാലങ്ങളും ഇവിടെ സംരക്ഷിക്കപ്പെടുന്നുണ്ട്. ഇതിന് മുകളിലൂടെ വിമാനം പറക്കുന്നത് അന്തരീക്ഷ- ശബ്ദ മലിനീകരണത്തിന് ഇടയാക്കും. ഇക്കാരണത്താലാണ് ഗാവയ്ക്ക് മുകളിലൂടെ വിമാനങ്ങൾ പറത്തുന്നതിന് അധികൃതർ അനുമതി നൽകാത്തത്.
