പാലക്കാട്: ഇന്ത്യയെ താറടിച്ചും ഇല്ലാത്ത ജീവിതനിലവാരത്തിന്റെ പേരിൽ കേരളത്തെ പൊക്കിപ്പറഞ്ഞും തയ്യാറാക്കിയ ചോദ്യപ്പേപ്പർ വിവാദമാകുന്നു. പാലക്കാട് ജില്ലാ ലൈബ്രറി കൗൺസിൽ സ്കൂൾ കുട്ടികൾക്കായി നടത്തിയ മത്സരത്തിലാണ് വിവാദ ചോദ്യം ഇടംപിടിച്ചത്. സിപിഎം നേതാക്കൾ ഭാരവാഹികളായ ജില്ലാ ലൈബ്രറി കൗൺസിലിന്റെ ചോദ്യപേപ്പറിലാണ് വിചിത്രമായ ചോദ്യം പ്രത്യക്ഷപ്പെട്ടത്.
പാലക്കാട് ജില്ലയിലെ എല്ലാ വായനശാലകളുമായി ബന്ധപ്പെടുത്തി നടത്തിയ വായനോത്സവത്തിൽ യുപി വിഭാഗക്കാർക്കായി നടത്തിയ മത്സരത്തിലെ ചോദ്യ കടലാസിലാണ് കേരളത്തെ യൂറോപ്പുമായി താരതമ്യം ചെയ്യുന്നത്.
ചോദ്യം ഇങ്ങനെ- ‘ലോകത്തിലെ ദരിദ്രരാജ്യങ്ങളുടെ പട്ടികയിൽ ഒന്നാം സ്ഥാനത്താണ് ഇന്ത്യ. എന്നാൽ യൂറോപ്പിനെയും അമേരിക്കയെയും പോലെ ജീവിത പുരോഗതി പ്രാപിച്ച ഒരു സംസ്ഥാനം ഇവിടെ ഉണ്ട്. ഏതാണ് അത് ? ‘
ഗുജറാത്ത്, ബീഹാർ, പശ്ചിമ ബംഗാൾ, കേരളം, തമിഴ്നാട് എന്നിവയാണ് ഓപ്ഷനുകൾ ഉള്ളത്. ഉത്തരസൂചികയിൽ ശരിയുത്തരമായി കേരളം എന്നുമുണ്ട്.
ഈ ചോദ്യക്കടലാസ് സമൂഹമാദ്ധ്യമങ്ങളിൽ പ്രചരിച്ചതോടെ വിമർശനവുമായി രക്ഷിതാക്കൾ ഉൾപ്പെടെ രംഗത്തെത്തി. ഏത് പഠനം അടിസ്ഥാനമാക്കിയാണ് കേരളം യൂറോപ്പിനൊപ്പമാണെന്ന് പറയുന്നത് എന്നാണ് ഇവർ ചോദിക്കുന്നത്. എന്നാൽ അതെല്ലാം ജനങ്ങൾക്ക് അറിയാം എന്നാണ് സിപിഎം നേതാക്കളുടെ മറുപടി.
കേരളത്തിലെ ജീവിതനിലവാരം യൂറോപ്പിന് സമാനമാണെന്ന് സിപിഎം പാർട്ടി കോൺഗ്രസിൽ പങ്കെടുക്കാനെത്തിയ സിപിഎം ജനറൽ സെക്രട്ടറി സീതാറാം യെച്ചൂരി അഭിപ്രായപ്പെട്ടിരുന്നു. എന്നാൽ യാഥാർത്ഥ്യങ്ങൾ കാണാതെയുളള യെച്ചൂരിയുടെ വാക്കുകളോട് വലിയ വിമർശനമാണ് വിവിധ കോണുകളിൽ നിന്ന് ഉയർന്നത്. ട്രോളുകളിലൂടെ സമൂഹമാദ്ധ്യമങ്ങളും ഇതിനോട് രൂക്ഷമായിട്ടാണ് പ്രതികരിച്ചത്. ഇതിന് പിന്നാലെയാണ് സമാനമായ ചോദ്യം ലൈബ്രറി കൗൺസിൽ പരീക്ഷയിലും ഇടംപിടിച്ചത്.
