എല്ലാവർക്കുമുള്ള ആ മൂന്ന് ജീവിതം; നിഗൂഢതയൊളിപ്പിച്ച് ജിത്തു-മോഹൻലാൽ ചിത്രം ട്വൽത്ത് മാൻ ടീസർ

കൊച്ചി: പ്രേക്ഷകരെ കയ്യിലെടുക്കാൻ ജിത്തുജോസഫ്-മോഹൻ ലാൽ കൂട്ടുകെട്ട് വീണ്ടുമെത്തുന്നു.ഒടിടി റിലീസ് പ്രഖ്യാപിച്ച ട്വൽത്ത് മാനിന്റെ ടീസർ പുറത്തു വിട്ടു.
മോഹൻലാൽ തന്നെയാണ് ടീസർ സാമൂഹിക മാദ്ധ്യമങ്ങളിലൂടെ റിലീസ് ചെയ്തത്.

പൊതു ജീവിതം, സ്വകാര്യ ജീവിതം, രഹസ്യ ജീവിതം എന്നീ ഒരു വ്യക്തിയുടെ മൂന്ന് തരത്തിലുള്ള ജീവിതങ്ങളുടെ കഥയാണ് ട്വൽത്ത് മാൻ എന്നാണ് ടീസർ നൽകുന്ന സൂചന.കെ ആർ കൃഷ്ണകുമാറിന്റെ തിരക്കഥയിലാണ് ട്വൽത്ത്മാൻ എത്തുന്നത്. ആശിർവാദ് സിനിമാസിന്റെ ബാനറിൽ ആൻറണി പെരുമ്പാവൂർ ആണ് ചിത്രം നിർമിക്കുന്നത്.

കഴിഞ്ഞ വർഷം ഓഗസ്റ്റിലാണ് സിനിമയുടെ ചിത്രീകരണം ആരംഭിച്ചത്. 24 മണിക്കൂറിനുള്ളിൽ നടക്കുന്ന ഒരു കഥയാണ് ചിത്രമെന്ന് ജീത്തു ജോസഫ് വെളിപ്പെടുത്തിയിരുന്നു.

അനുശ്രീ, അദിതി രവി, ഷൈൻ ടോം ചാക്കോ, സൈജു കുറുപ്പ്, വീണാ നന്ദകുമാർ, ശിവദ നായർ തുടങ്ങി ഒട്ടേറെ താരങ്ങൾ ട്വൽത്ത് മാനിൽ അഭിനയിക്കുന്നുണ്ട്. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിർവഹിക്കുന്നത്. രാജീവ് കോവിലകമാണ് ചിത്രത്തിന്റെ കലാസംവിധായകൻ. ലിന്റ ജീത്തുവാണ് ചിത്രത്തിന്റെ കോസ്റ്റ്യൂം ഡിസൈൻ.