അടുത്ത ലക്ഷ്യം കൊക്ക-കോളയെന്ന് മസ്‌ക്; കൊക്കെയ്ൻ ഉൾപ്പെടുത്തിയ പഴയ കോളയാക്കി മാറ്റുമെന്നും പ്രഖ്യാപനം; കൺഫ്യൂഷനടിച്ച് സോഷ്യൽമീഡിയ

ട്വിറ്റർ ഏറ്റെടുത്തതിന് പിന്നാലെ ലോക സമ്പന്നൻ ഇലോൺ മസ്‌ക് നടത്തിയ പുതിയ പ്രഖ്യാപനമാണ് ഇപ്പോഴത്തെ ചർച്ചാ വിഷയം. അടുത്തതായി കൊക്ക-കോള വാങ്ങുമെന്നും കോളയിൽ കൊക്കെയ്ൻ തിരികെ കൊണ്ടുവരുമെന്നായിരുന്നു മസ്‌കിന്റെ പുതിയ ട്വീറ്റ്.

Next I’m buying Coca-Cola to put the cocaine back in

— Elon Musk (@elonmusk) April 28, 2022

കൊക്ക-കൊളയെന്ന കമ്പനിയെ സ്വന്തമാക്കുമെന്ന പ്രഖ്യാപനത്തേക്കാൾ, കോളയിൽ കൊക്കെയ്ൻ സാന്നിധ്യം തിരികെ കൊണ്ടുവരുമെന്ന മസ്‌കിന്റെ വാക്കുകളാണ് അമ്പരപ്പുണ്ടാക്കുന്നത്. യഥാർത്ഥത്തിൽ മസ്‌കിന്റെ പ്രഖ്യാപനം വെറുമൊരു തമാശയാണോ അതോ കമ്പനി ഏറ്റെടുക്കുന്നതിനെക്കുറിച്ച് അദ്ദേഹം ഗൗരവത്തിൽ ആലോചിച്ചിട്ടുണ്ടോയെന്നത് വ്യക്തമല്ല. എന്നിരുന്നാലും കോളയിൽ കൊക്കെയ്ൻ അടങ്ങിയിരുന്നോ എന്ന ചോദ്യം സമൂഹ മാദ്ധ്യമങ്ങളിൽ ഉയരുകയാണ്.

മസ്‌കിന്റെ പ്രഖ്യാപനത്തിൽ നിന്നും ഒരു കാര്യം വ്യക്തമായിരുന്നു. നിലവിൽ നാം കുടിക്കുന്ന കൊക്ക-കോളയിൽ കൊക്കെയ്ൻ അടങ്ങിയിട്ടില്ല. പക്ഷേ മുമ്പുണ്ടായിരുന്നു. എന്നാൽ ഇക്കാര്യം വാസ്തവമാണോ എന്ന ചോദ്യത്തിന് ഉണ്ടെന്ന് തന്നെയാണ് ഉത്തരം. 1885ൽ പുറത്തിറക്കിയ ശീതളപാനീയമായ കൊക്ക-കോളയിൽ കൊക്കെയ്ൻ അടങ്ങിയിരുന്നു.

ജോർജിയയിലുള്ള ഫാർമസിസ്റ്റ് ആയിരുന്ന ജോൺ പെമ്പേർട്ടൻ ആണ് കൊക്ക-കോള വികസിപ്പിച്ചത്. അന്നത്തെ കോളയുടെ ഫോർമുലയിൽ വളരെ ചെറിയ അളവിൽ കൊക്കെയ്‌നും അടങ്ങിയിരുന്നതായി യുഎസിന്റെ നാഷണൽ ഇൻസ്റ്റിറ്റ്യൂട്ട് ഓഫ് ഡ്രഗ് അബ്യൂസ് വ്യക്തമാക്കുന്നു.

കൊക്ക-കോള എന്ന പേരുപോലും ആവിർഭവിച്ചത് കൊക്കെയ്ൻ അടങ്ങിയിരുന്നതിനാലാണെന്നും പറയപ്പെടുന്നു. അന്നത്തെ കാലത്ത് യുഎസിൽ കൊക്കെയ്ൻ നിയമവിരുദ്ധമായിരുന്നില്ല. പല മരുന്നുകളിലും സാധാരണയായി ഉപയോഗിച്ച് വന്നിരുന്ന ഘടകമായാണ് കൊക്കെയ്‌നിനെ കണക്കാക്കിയിരുന്നത്. അതുകൊണ്ട് തന്നെ ഒരു ബ്രയിൻ ടോണിക്ക് എന്ന രീതിയിൽ മരുന്ന് പാനീയമെന്ന ലേബലിലാണ് കൊക്ക-കോള പുറത്തിറക്കുകയും ചെയ്തത്.

ക്ഷീണം, വയറിലെ പ്രശ്‌നങ്ങൾ, തലവേദന എന്നിവയ്‌ക്ക് പരിഹാരം നൽകാൻ കൊക്ക-കോളയ്‌ക്ക് കഴിയുമെന്ന രീതിയിൽ ബ്രയിൻ ടോണിക് വിപണിയിൽ പ്രവേശിക്കുകയും ചെയ്തു. ഇന്നത്തെ പോലെ ഡ്രഗ് റെഗുലേഷൻസ് ഒന്നും തന്നെ 19-ാം നൂറ്റാണ്ടിൽ ഇല്ലാതിരുന്നതിനാൽ ‘കൊക്കെയ്ൻ കോള’ വിപണി കീഴടക്കുകയും ചെയ്തു. ഇതിന് സമാനമായി മറ്റ് പല ഉൽപാദകരും ശീതളപാനിയങ്ങളിൽ ലഹരി മരുന്നുകൾ ഉൾപ്പെടുത്തി പുറത്തിറക്കാനും തുടങ്ങി.

എന്നാൽ 1891 ആയപ്പോൾ കോളയിൽ ഉപയോഗിക്കുന്ന കൊക്കെയ്‌നിനെതിരെ പലരും രംഗത്തെത്തി. തൽഫലമായി കൊക്ക-കോള ഉൾപ്പെടെ എല്ലാ ഉൽപാദകരും തങ്ങളുടെ ശീതള പാനീയത്തിലെ ലഹരി പദാർത്ഥങ്ങളുടെ ഉപയോഗം കുറയ്‌ക്കാൻ ആരംഭിച്ചു. ചെറിയ തോതിൽ കുറച്ച് കൊണ്ടുവന്ന് ഒടുവിൽ 1929 ആയപ്പോഴേക്കും പൂർണമായും കോളയിൽ നിന്ന് കൊക്കെയ്ൻ മിശ്രിതം ഒഴിവാക്കുകയായിരുന്നു.