പല തരത്തിലാണ് എല്ലാവരുടെയും ജീവിതത്തിൽ അത്ഭുതങ്ങൾ വന്നുഭവിക്കുന്നത്. അത്തരത്തിൽ ആൻഡി ഇവാൻസ് എന്ന വ്യക്തിയുടെ ജീവിതത്തിൽ സംഭവിച്ച അത്ഭുതമാണ് സമൂഹമാദ്ധ്യമങ്ങളിൽ ചർച്ചയാവുന്നത്. ഏഴ് വർഷങ്ങൾക്ക് മുൻപ് നഷ്ടപ്പെട്ട് പോയ തന്റെ പേഴ്സ് തികച്ചും അപ്രതീക്ഷിതമായി തിരികെ കിട്ടിയതിന്റെ ഞെട്ടലിലാണ് ഇവാൻസ്.
2015 ജൂണിൽ ഒരു ലൈവ് ഷോ കഴിഞ്ഞ് മടങ്ങവേയാണ് ഇവാൻസിന് തന്റെ പേഴ്സ് നഷ്ടമായത്. ബാങ്ക് കാർഡുകളും, ഡ്രൈവിംഗ് ലൈസൻസും, 134 പൗണ്ടും അടങ്ങിയ പേഴ്സ് തിരികെ ലഭിക്കുന്നതിനായി ഇവാൻസ് പഠിച്ച പണി പതിനെട്ടും നോക്കി. എന്നാൽ നിരാശയായിരുന്നു ഫലം. താൻ സഞ്ചരിച്ച ടാക്സി കാർ പിന്തുടർന്ന് പോയിട്ടും ഇവാൻസിന് തന്റെ പേഴ്സ് ലഭിച്ചില്ല. അത് എന്നെന്നേക്കുമായി നഷ്ടപ്പെട്ടെന്ന് ഇവാൻസ് തിരിച്ചറിഞ്ഞു.
എന്നാൽ പേഴ്സ് നഷ്ടപ്പെട്ട് ഏഴ് വർഷം അടുക്കുമ്പോൾ, ഇവാൻസിന്റെ ആ പേഴ്സ് അയാൾക്ക് തിരികെ ലഭിച്ചിരിക്കുകയാണ്. സംഭവത്തിന്റെ നടുക്കം ഇപ്പോഴും മാറിയിട്ടില്ലെന്നാണ് ഇവാൻസ് പറയുന്നത്. പേഴ്സ് തുറന്ന് നോക്കിയപ്പോൾ, തന്റെ ഡ്രൈവിംഗ് ലൈൻസൻസും, ബാങ്ക് കാർഡും, 134 പൗണ്ടും അതേപടി അതിലുണ്ടായിരുന്നുവെന്നും ഇവാൻസ് പറയുന്നു. എന്നാൽ അതിലെ ചില നാണയങ്ങളും നോട്ടുകളും ഇന്ന് പ്രചാരത്തിലില്ല. പേഴ്സ് തിരികെ ലഭിച്ച കവറിൽ ഒരു ഇ-മെയിൽ സന്ദേശമുണ്ടായിരുന്നു. അതാരുടേതാണെന്ന് ഇനിയും കണ്ടെത്താനായിട്ടില്ല. എന്നാലും ആ മെയിലിലേയ്ക്ക് താൻ സന്ദേശം അയച്ചാതയും ഇവാൻസ് പറയുന്നു.
Comments