ബോക്സ് ഓഫീസിൽ ആയിരം കോടി കളക്ഷൻ നേടി യഷ് ചിത്രം കെജിഎഫ് ചാപ്റ്റർ ടൂ പ്രദർശനം തുടരുകയാണ്. ചിത്രത്തിലും ജീവിതത്തിലും കൈയ്യടി ഏറ്റുവാങ്ങുകയാണ് കന്നഡ സൂപ്പർ താരം യഷ്. പാൻ മസാല പരസ്യത്തിൽ അഭിനയിക്കുന്നതിനായി കോടികൾ നൽകാമെന്ന് പറഞ്ഞ് സമീപിച്ചവരെ തിരിച്ചയച്ചിരിക്കുകയാണ് താരം. നേരത്തെ പാൻമസാല പരസ്യത്തിൽ പ്രത്യക്ഷപ്പെട്ടതിന് ബോളിവുഡ് താരം അക്ഷയ് കുമാർ ക്ഷമ ചോദിച്ചിരുന്നു. പിന്നാലെയാണ് പരസ്യത്തിൽ നിന്നും യഷ് പിൻവാങ്ങിയ വിവരം പുറത്തുവരുന്നത്.
ഫാൻസിന്റേയും ഫോളോവേഴ്സിന്റേയും താത്പര്യങ്ങളെ മാനിച്ചുകൊണ്ട് യഷ് കോടികളുടെ പാൻ മസാല പരസ്യ ഡീലിൽ നിന്നും പിൻവാങ്ങിയതായി യഷിന്റെ ഏജൻസിയാണ് പ്രസ്താവനയിലൂടെ അറിയിച്ചത്. പാൻ മസാല പോലുള്ള ഉത്പ്പനങ്ങൾ ഉപയോഗിക്കുന്നത് ആരോഗ്യത്തിന് ഹാനീകരമാണെന്നും ഏജൻസി അറിയിച്ചു. തന്റെ സന്ദേശം നിരവധി പേരെ അത് ഉപയോഗിക്കാൻ പ്രോത്സാഹിപ്പിക്കുമെന്ന ബോദ്ധ്യത്തിന്റെ അടിസ്ഥാനത്തിലാണ് പിൻവാങ്ങലെന്ന് താരവുമായി ബന്ധപ്പെട്ട അടുത്ത വൃത്തങ്ങൾ അറിയിച്ചു.
അതിനിടെ കെജിഎഫ് ആയിരം കോടി ക്ലബ്ബിൽ ഇടം നേടിയിരിക്കുകയാണ്. ഇന്ത്യൻ സിനിമാ ഇൻഡസ്ട്രിയിൽ ആയിരം കോടി ക്ലബ്ബിൽ ഇടം പിടിക്കുന്ന നാലാമത്തെ ചിത്രമാണ് കെജിഎഫ് ചാപ്റ്റർ 2. രണ്ടായിരം കോടി ക്ലബ്ബിൽ ഇടം നേടിയ ആമിർ ഖാൻ ചിത്രം ദംഗൽ, 1700 കോടി ക്ലബ്ബിൽ ഇടം നേടിയ ബാഹുബലി 2, 1100 കോടിയ്ക്ക് മുകളിൽ പ്രദർശനം തുടരുന്ന രാജമൗലി ചിത്രം ആർആർആർ എന്നിവയാണ് ഇതിന് മുൻപ് ഈ നേട്ടം കൈവരിച്ച ചിത്രങ്ങൾ.
Comments