ലക്നൗ: ഉത്തർപ്രദേശ് മുഖ്യമന്ത്രി യോഗി ആദിത്യനാഥുമായി കൂടിക്കാഴ്ച്ച നടത്തി ബോളിവുഡ് താരം കങ്കണ റണാവത്ത്. ഉത്തർപ്രദേശിലെ വൺ ഡിസ്ട്രിക്റ്റ് വൺ പ്രൊഡക്ട് പദ്ധതിയുടെ ബ്രാൻഡ് അംബാസഡറായാണ് കങ്കണ മുഖ്യമന്ത്രിയെ കണ്ടത്. കൂടിക്കാഴ്ചയുടെ ചിത്രം സോഷ്യൽ മീഡിയയിൽ പങ്കുവെച്ച് കങ്കണ കുറിച്ച വാക്കുകളാണ് ശ്രദ്ധനേടുന്നത്.
‘എനിക്ക് മഹാരാജാവിനെ കാണാനുള്ള മഹാഭാഗ്യം ലഭിച്ചു’ എന്നാണ് കങ്കണ ഇൻസ്റ്റഗ്രാമിൽ കുറിച്ചത്. ഉത്തർപ്രദേശ് മുഖ്യമന്ത്രിയുടെ വസതിയിൽവെച്ചാണ് കങ്കണ സന്ദർശനം നടത്തിയത്. യോഗി ആദിത്യനാഥ് എപ്പോഴും തന്നെ വിസ്മയിപ്പിച്ചുകൊണ്ടിരിക്കുന്നുവെന്നും കൂടിക്കാഴ്ച്ചയ്ക്ക് ശേഷം കങ്കണ റണാവത്ത് പറഞ്ഞു. 2022ലെ നിയമസഭാ തിരഞ്ഞെടുപ്പിൽ യോഗിയ്ക്ക് വേണ്ടി താരം പ്രചാരണത്തിനിറങ്ങിയിരുന്നു.
‘തിരഞ്ഞെടുപ്പുകളിലെ വൻ വിജയത്തിന് ശേഷം മഹാരാജ് യോഗി ആദിത്യനാഥ് ജിയെ കാണാൻ ഇന്ന് എനിക്ക് മഹാ ഭാഗ്യമുണ്ടായി. ഒരു മികച്ചൊരു സായാഹ്നമായിരുന്നു അത്. മഹാരാജ് ജിയുടെ അനുകമ്പയും ഉത്കണ്ഠയും ആഴത്തിലുള്ള ബോധവും എന്നെ അത്ഭുതപ്പെടുത്താറില്ല, അദ്ദേഹം ഇപ്പോഴും എന്നെ വിസ്മയിപ്പിച്ചികൊണ്ടിരിക്കുകയാണ്. ബഹുമാനവും പ്രചോദനവും തോന്നുന്നു. കങ്കണ കുറിച്ചു.
