കൊച്ചി: തൃക്കാക്കരയിൽ ആം ആദ്മി-ട്വന്റി20 സഖ്യം സ്ഥിരീകരിച്ച് സാബു എം ജേക്കബ്. ആം ആദ്മിയും ട്വന്റി ട്വന്റിയും എൽഡിഎഫിനും യുഡിഎഫിനും ബദലായി മാറും. കഴിഞ്ഞ തവണ നേടിയതിനെക്കാൾ വോട്ട് ഇത്തവണ നേടുമെന്നും സാബു എം ജേക്കബ് അവകാശപ്പെട്ടു. 2021ൽ പതിനാലായിരത്തോളം വോട്ടുകളാണ് തൃക്കാക്കര മണ്ഡലത്തിൽ നിന്ന് ട്വന്റി ട്വന്റി നേടിയത്. 14,329 വോട്ടിനാണ് പി.ടി.തോമസ് തൃക്കാക്കരയിൽ വിജയിച്ചത്.
പി.ടി.തോമസിന്റെ നിര്യാണത്തെ തുടർന്ന് ഒഴിവ് വരുന്ന ഒഴിവ് വരുന്ന സീറ്റിലേക്കാണ് 31ാം തിയതി ഉപതിരഞ്ഞെടുപ്പ് നടക്കുന്നത്. മെയ് നാലിനാണ് വിജ്ഞാപനം പുറപ്പെടുവിക്കുന്നത്. മെയ് പതിനൊന്ന് വരെ നാമനിർദ്ദേശ പത്രിക സമർപ്പിക്കാം. 12ന് പത്രികകളുടെ സൂക്ഷ്മ പരിശോധന നടക്കും. 16ാം തിയതി വരെ പത്രിക പിൻവലിക്കാൻ സമയം അനുവദിക്കും. ജൂൺ മൂന്നിനാണ് വോട്ടെണ്ണൽ.
