സാഹസിക പ്രകടനങ്ങൾ നടത്തിയും, വേറിട്ട് നിൽക്കുന്ന കാര്യങ്ങൾ ചെയ്തും ഗിന്നസ് റെക്കോർഡിൽ ഇടം നേടിയവർ ഏറെയാണ്. എന്നാൽ വലുതായി വായ തുറന്നാൽ ഗിന്നസിൽ കേറാൻ പറ്റുമോ? അതിനും സാധിക്കുമെന്ന് തെളിയിച്ചിരിക്കുകയാണ് സമാന്ത റാംസ്ഡെൽ എന്ന അമേരിക്കക്കാരി. ഏറ്റവും വലിയ അളവിൽ വായ തുറന്നാണ് ഇവർ ഗിന്നസ് ലോക റെക്കോർഡ് സ്വന്തമാക്കിയത്. 6.52 സെന്റീമീറ്റർ വിസ്തൃതിയിൽ വായ് തുറന്ന് യുവതി ലോകത്തെ തന്നെ ഞെട്ടിച്ചു.
ടിക്ക് ടോക്കിലൂടെ സമൂഹമാദ്ധ്യമങ്ങളിൽ താരമായ ഈ 31 കാരിക്ക് 10 ലക്ഷത്തിലധികം ഫോളോവേഴ്സുണ്ട്.അഭിനയത്തിലും അവതരണത്തിലുമുള്ള തന്റെ കഴിവുകൾ പങ്കുവെക്കുക എന്ന ഉദ്ദേശത്തോടെയായിരുന്നു തുടക്കം. പിന്നീട് തന്റെ വലിയ വായ ഉപയോഗിച്ചുള്ള ചില പ്രകടനങ്ങൾ നടത്തി. സാൻഡ് വിച്ച്, ഫ്രഞ്ച് ഫ്രൈയ് തുടങ്ങിയവ ഒന്നിച്ച് വായിൽ ആക്കുന്ന വീഡിയോകളാണ് ഇവർ പോസ്റ്റ് ചെയ്തിരുന്നത്. ഒരു ആപ്പിൾ മുഴുവനായി തനിക്ക് വായ്ക്കുള്ളിൽ ആക്കാനാകും എന്നും യുവതി അവകാശപ്പെടുന്നു.
തന്റെ ഈ പ്രത്യേക കഴിവ് കണ്ടെത്തിയപ്പോൾ അത് കൂടുതൽ വീഡിയോകൾ ചെയ്യാൻ പ്രേരണയായെന്ന് സമാന്ത പറഞ്ഞു. ഞാൻ വളരെ ചെറിയ കാര്യമായി സൂക്ഷിക്കാൻ ആഗ്രഹിച്ചിരുന്ന കാര്യം ഇന്ന് എന്നിലെ മികച്ച കാര്യമായി മാറിയിരിക്കുന്നു. 31 വയസ്സുള്ള എനിക്ക് ഇത്തരം അംഗീകാരം ലഭിക്കുമെന്ന് കരുതിയില്ല. ഓരോരുത്തർക്കും ലഭിക്കുന്ന അസാധാരണ ശക്തിയാണ് ഇത്തരം കാര്യങ്ങൾ. മറ്റുള്ളവരിൽ നിന്നും നിങ്ങളെ വ്യത്യസ്ഥനാക്കുന്ന സവിശേഷതയാണ് ഇവ എന്നും സമാന്ത പറയുന്നു.
സൗത്ത് നോർവാക്കിലെ ഒരു ദന്ത ആരോഗ്യ കേന്ദ്രത്തിൽ എത്തിയാണ് തനിക്ക് എത്രത്തോളം വലിപ്പത്തിൽ വായ് തുറക്കാനാകും എന്ന് സമാന്ത പരിശോധിച്ചത്. ഒരു ഗിന്നസ് പ്രതിനിധിയും ഇവരോടൊപ്പം പോയിരുന്നു. മുകളിൽ നിന്നും ചുണ്ടിന്റെ അടി ഭാഗം വരെ 2.6 ഇഞ്ച് ഉയരം ഉണ്ടെന്നാണ് പരിശോധനയിൽ കണ്ടെത്തിയത്. ഇതോടെ ലോകത്ത് ഏറ്റവും വലുതായി വായ തുറക്കാൻ കഴിയുന്ന വനിതയായി സമാന്ത റാംസ്ഡെൽ.
പുരുഷൻമാരിൽ വലിപ്പത്തിൽ വായ് തുറക്കാൻ കഴിയുന്നതിനുള്ള ഗിന്നസ് ലോക റെക്കോർഡ് നേടിയ ഇസാക്ക് ജോൺസുമായി ചേർന്നും സമാന്ത വീഡിയോ ചെയ്തിരുന്നു. 4 ഇഞ്ച് വലിപ്പത്തിലാണ് ഇസാക്കിന് വായ് തുറക്കാൻ സാധിക്കുക.
Comments