കൊൽക്കത്ത: ബംഗാൾ സർക്കാരിന് വേണ്ടി വാദിക്കാൻ കൽക്കട്ട ഹൈക്കോടതിയിലെത്തിയ മുതിർന്ന കോൺഗ്രസ് നേതാവും അഭിഭാഷകനുമായ പി.ചിദംബരത്തിനെതിരെ പ്രതിഷേധവുമായി കോൺഗ്രസ് അനുകൂല അഭിഭാഷകരും പാർട്ടി പ്രവർത്തകരും. ബംഗാളിലെ കോൺഗ്രസ് അധ്യക്ഷൻ അധീർ രഞ്ജൻ ചൗധരി തൃണമൂൽ സർക്കാരിനെതിരെ നൽകിയ മെട്രോ ഡയറി കേസിൽ ബംഗാൾ സർക്കാരിന് വേണ്ടി വാദിക്കാനാണ് ചിദംബരം എത്തിയത്. പി ചിദംബരം കോൺഗ്രസ് പാർട്ടി പ്രവർത്തകരുടെ വികാരം വച്ച് കളിക്കുകയാണെന്നാണ് പ്രതിഷേധവുമായി രംഗത്തെത്തിയ അഭിഭാഷകർ ആരോപിച്ചത്.
ചിദംബരം ഗോ ബാക്ക് വിളികളുമായി അഭിഭാഷകർ ചിദംബരത്തിനെതിരെ പ്രതിഷേധിക്കുന്ന വീഡിയോ സമൂഹമാദ്ധ്യമങ്ങളിലടക്കം വ്യാപകമായി പ്രചരിക്കുന്നുണ്ട്. ചിദംബരത്തെ പോലെയുള്ളവർ കോൺഗ്രസിനെ നശിപ്പിക്കുകയാണെന്നും, മമതയുടെ അടിമയായി ചിദംബരം മാറിയെന്നും അഭിഭാഷകർ ആക്രോശിക്കുന്നുണ്ടായിരുന്നു.
മമതയുടെ ഭരണത്തിന് കീഴിൽ സംസ്ഥാനത്തെ കോൺഗ്രസ് പ്രവർത്തകരെല്ലാം വലിയ ദുരിതമാണ് അനുഭവിക്കുന്നത്. എന്നിട്ട് കോൺഗ്രസിനെ തകർക്കാൻ വേണ്ടി മമതയ്ക്ക് വേണ്ടി വക്കാലത്ത് എടുത്ത ചിദംബരത്തെ പാർട്ടിയിൽ നിന്ന് പുറത്താക്കണമെന്നും അഭിഭാഷകരും പ്രവർത്തകരും ആക്രോശിക്കുന്നുണ്ടായിരുന്നു. പ്രതിഷേധം ഉയർത്തിയവരുടേത് വളരെ സ്വാഭാവികമായ പ്രതികരണം മാത്രമാണെന്ന് അധിർ രഞ്ജർ ചൗധരിയും പറഞ്ഞു.
