ചെന്നൈ : മാതൃദിനത്തിൽ ഇഡ്ഡലി അമ്മയ്ക്ക് പ്രമുഖ വ്യവസായി ആനന്ദ് മഹീന്ദ്രയുടെ സ്നേഹ സമ്മാനം. സ്വന്തമായൊരു വീടെന്ന ഇഡ്ഡലി അമ്മയുടെ വർഷങ്ങളായുള്ള സ്വപ്നമാണ് ഈ വിശിഷ്ട ദിനത്തിൽ ആനന്ദ് മഹീന്ദ്ര പൂർത്തീകരിച്ചത്. ഇഡ്ഡലി അമ്മയ്ക്ക് വീടിന്റെ താക്കോൽ കൈമാറുന്ന വീഡിയോ ട്വിറ്ററിൽ പങ്കുവെച്ചാണ് അദ്ദേഹം ഈ സന്തോഷ വിവരം ഏവരെയും അറിയിച്ചത്.
ഇഡ്ഡലി അമ്മ എന്ന് അറിയപ്പെടുന്ന കമലദള ഒരു രൂപയ്ക്ക് ഇഡ്ഡലി വിറ്റാണ് വാർത്തകളിൽ ഇടം നേടിയത്. കഴിഞ്ഞ 37 വർഷമായി ഇവർ ഇഡ്ഡലി സാമ്പാറിനും ചട്നിയ്ക്കുമൊപ്പം ഒരു രൂപ നിരക്കിലാണ് ആളുകൾക്ക് നൽകുന്നത്. ഇഡ്ഡലി അമ്മയെക്കുറിച്ച് കേട്ടറിഞ്ഞ ആനന്ദ് മഹീന്ദ്ര കഴിഞ്ഞ വർഷമാണ് ട്വിറ്ററിലൂടെ വീടു നൽകുമെന്ന് അറിയിച്ചത്. സ്വന്തം വീട്ടിൽ ഭക്ഷണം നൽകി ആളുകളെ സേവിക്കാൻ ഇഡ്ഡലി അമ്മയ്ക്ക് അധികം വൈകാതെ സാധിക്കുമെന്നായിരുന്നു അദ്ദേഹത്തിന്റെ ട്വീറ്റ.് അന്ന് സമൂഹമാദ്ധ്യമങ്ങളിൽ വലിയ ചർച്ചയായ ട്വീറ്റിന് കയ്യടികളുമായി നിരവധി പേരാണ് എത്തിയത്. എന്നാൽ ഇന്ന് വീടിന്റെ താക്കോൽ കൈമാറി വീണ്ടും ജനങ്ങളുടെ കണ്ണും മനസ്സും നിറച്ചിരിക്കുകയാണ് ആനന്ദ് മഹീന്ദ്ര.
ഇഡ്ഡലി അമ്മയുടെ വീടിന്റെ നിർമ്മാണത്തിന്റെ ഓരോ ഘട്ടവും കോർത്തിണക്കിക്കൊണ്ടുള്ള വീഡിയോ ആണ് അദ്ദേഹം ട്വിറ്ററിൽ പങ്കുവെച്ചിരിക്കുന്നത്. ഇഡ്ഡലി അമ്മയുടെ വീടിന്റെ നിർമ്മാണം സമബന്ധിതമായി പൂർത്തികരിച്ച സംഘത്തിന് ആനന്ദ് മഹീന്ദ്ര അഭിനന്ദനങ്ങൾ അറിയിച്ചു. അമ്മയുടെ സദ്ഗുണങ്ങളുടെ പ്രതിബിംബമാണ് ഇഡ്ഡലി അമ്മ. ഇഡ്ഡലി അമ്മയെ പിന്തുണയ്ക്കാൻ സാധിച്ചതിൽ സന്തോഷമുണ്ടെന്നും ആനന്ദ് മഹീന്ദ്ര വ്യക്തമാക്കി. അതേസമയം അദ്ദേഹത്തിന്റെ സദ്പ്രവൃത്തിയെ അഭിനന്ദിച്ച് നിരവധി പേരാണ് രംഗത്തുവന്നത്.
Comments