കൊച്ചി : തൃക്കാക്കരയിലെ ഇടത് മുന്നണി സ്ഥാനാർത്ഥി ജോ ജോസഫിന്റെ പ്രചാരണ പരിപാടിയിൽ പങ്കെടുക്കാൻ മുഖ്യമന്ത്രി പിണറായി വിജയൻ ഇന്ന് തൃക്കാക്കരയിൽ എത്തും. പാലാരിവട്ടത്ത് നടക്കുന്ന തിരഞ്ഞെടുപ്പ് കൺവെൻഷൻ മുഖ്യമന്ത്രി ഉദ്ഘാടനം ചെയ്യും. കോൺഗ്രസ് മുതിർന്ന നേതാവ് കെ വി തോമസും കൺവെൻഷനിൽ പങ്കെടുക്കും.
കെ വി തോമസ് ആദ്യമായാണ് ഇടത് മുന്നണിയുടെ പ്രചാരണ വേദിയിൽ എത്തുന്നത്. ഇതിന് മുന്നോടിയായി മുഖ്യമന്ത്രിയുമായി കെ വി തോമസ് കൂടിക്കാഴ്ച നടത്തി. ഇന്നലെ രാത്രിയാണ് ഇരു നേതാക്കളും എറണാകുളത്തെ ഗസ്റ്റ് ഹൗസിൽ വെച്ച് കൂടിക്കാഴ്ച നടത്തിയത്. വികസന കാര്യങ്ങളാണ് ചർച്ച ചെയ്തത് എന്ന് കെവി തോമസ് വ്യക്തമാക്കി.
കഴിഞ്ഞ ദിവസമാണ് തൃക്കാക്കരയിലെ ഇടത് സ്ഥാനാർത്ഥിയെ പിന്തുണച്ചുകൊണ്ട് കെ വി തോമസ് എത്തിയത്. തൃക്കാക്കര ഉപതിരഞ്ഞെടുപ്പിൽ എൽഡിഎഫിന് പിന്തുണ നൽകുമെന്നാണ് കെവി തോമസ് അറിയിച്ചത്. ഇതിനെതിരെ കോൺഗ്രസിലെ മുതിർന്ന നേതാക്കൾ രംഗത്തെത്തിയെങ്കിലും കെ വി തോമസ് നിലപാടിൽ മാറ്റം വരുത്തിയില്ല. ഈ സാഹചര്യത്തിൽ തൃക്കാക്കര തിരഞ്ഞെടുപ്പ് കോളിളക്കം തന്നെ സൃഷ്ടിക്കുമെന്നാണ് നിഗമനം.
