ന്യൂഡൽഹി: കേരളത്തിൽ കനത്ത മഴ ആരംഭിച്ചപ്പോൾ രാജ്യതലസ്ഥാനമായ ഡൽഹിയിൽ പൊരിവെയിലിൽ വെന്തുരുകുകയാണ് ജനങ്ങൾ. ഡൽഹിയിലെ നജഫ്ഗാർഹ് ഏരിയയിൽ 47 ഡിഗ്രിയും മുഗേഷ്പൂരിൽ 47.2 ഡിഗ്രി താപനിലയുമാണ് ഇന്ന് രേഖപ്പെടുത്തിയത്. ഡൽഹിയിൽ ഉഷ്ണതരംഗം ഇനിയും വർധിച്ചേക്കുമെന്നാണ് മുന്നറിയിപ്പ്.
സൽവാൻ പബ്ലിക് സ്കൂൾ ഏരിയ ഉൾപ്പെടുന്ന മയൂർ വിഹാറിൽ രേഖപ്പെടുത്തിയ 43.4 ഡിഗ്രിയാണ് കുറഞ്ഞ താപനില. ചൂട് കൂടുന്നതിന്റെ പശ്ചാത്തലത്തിൽ കേന്ദ്ര കാലാവസ്ഥാ വകുപ്പ് ഡൽഹിയിൽ ഓറഞ്ച് അലർട്ട് പ്രഖ്യാപിച്ചിരുന്നു. ഞായറാഴ്ച ദിവസത്തേക്ക് യെല്ലോ അലർട്ട് മുന്നറിയിപ്പാണ് നൽികിയിരിക്കുന്നത്.
ചൂട് ശക്തമായ സാഹചര്യത്തിൽ സ്കൂളുകളിൽ ക്ലാസ് സമയത്തിൽ മാറ്റം വരുത്താനാണ് നീക്കം. സ്വകാര്യ സ്കൂളുകൾക്ക് മെയ് അവസാനത്തോടെ അവധി നൽകും. അതേസമയം പാഠ്യ-പാഠ്യേതര പ്രവർത്തനങ്ങളിൽ ഇളവ് നൽകണമെന്നും യൂണിഫോമിന്റെ കാര്യത്തിൽ വിട്ടുവീഴ്ച ചെയ്യണമെന്നുമാണ് സർക്കാർ സ്കൂളുകൾക്ക് കേന്ദ്രം നൽകിയിരിക്കുന്ന നിർദേശം.
