മലപ്പുറം: വിദ്യാർത്ഥിനികളെ ലൈംഗികമായി ഉപദ്രവിച്ച മുൻ അദ്ധ്യാപകനും, സിപിഎം നേതാവുമായ കെ.ശശി കുമാർ ആൺകുട്ടികളെയും ചൂഷണം ചെയ്തിരുന്നതായി പോലീസ്. ഇതുമായി ബന്ധപ്പെട്ട് നിരവധി പരാതികൾ ലഭിച്ചതായി മലപ്പുറം സിഐ ജോബി തോമസ് പറഞ്ഞു. പരാതികളിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്. നിരവധി ആൺകുട്ടികളെയാണ് ഇയാൾ ഉപദ്രവിച്ചിരുന്നതെന്നാണ് വിവരം.
നിലവിൽ ശിവകുമാർ റിമാൻഡിലാണ്. വരും ദിവസങ്ങളിൽ ഇയാളെ വിവിധയിടങ്ങളിൽ എത്തിച്ച് തെളിവെടുക്കും. സ്‌കൂളിൽ നിന്നും അന്വേഷണ സംഘം തെളിവുകൾ ശേഖരിക്കും. അദ്ധ്യാപകനെതിരെ സ്‌കൂൾ അധികൃതർക്ക് വിദ്യാർത്ഥികളിൽ ചിലർ പരാതി നൽകിയിരുന്നെങ്കിലും ഇതിൽ അന്വേഷണം ഉണ്ടായില്ലെന്നാണ് ഉയരുന്ന ആരോപണം. ഇക്കാര്യവും പോലീസ് പരിശോധിക്കും.
വിദ്യാർത്ഥികളെ ഉപദ്രവിച്ച കേസിൽ കഴിഞ്ഞ ദിവസമാണ് ശശികുമാറിനെ പോലീസ് അറസ്റ്റ് ചെയ്തത്. കേസ് എടുത്തതിന് പിന്നാലെ ഇയാൾ ഒളിവിൽ പോകുകയായിരുന്നു. വയനാട്ടിൽ നിന്നുമാണ് ഇയാളെ പിടികൂടിയത്.
