കൊല്ലം: കൊല്ലം പത്തനാപുരത്ത് സ്വകാര്യ ബാങ്കിൽ വൻ കവർച്ച. 90 പവനോളം സ്വർണ്ണവും നാല് ലക്ഷത്തോളം രൂപയും മോഷ്ടാക്കൾ കവർന്നു. പത്തനാപുരം ജനതാ ജംഗ്ഷനിൽ പ്രവർത്തിക്കുന്ന പത്തനാപുരം ബാങ്കേഴ്സ് എന്ന സ്ഥാപനത്തിലാണ് മോഷണം നടന്നത്.
വിചിത്രമായ രീതിയിലൂടെയായിരുന്നു മോഷണം. ഓഫീസ് മുറിയുടെ ഭാഗത്ത് തറയിൽ മൂന്ന് ഇലകളും തമിഴ് ദൈവത്തിന്റെ ചിത്രവും വെച്ചിരുന്നു. നാരങ്ങയിൽ കുത്തിയ ശൂലം, മഞ്ഞ ചരട്, മദ്യം, മുറുക്കാൻ എന്നിവയും ഉണ്ടായിരുന്നു. പൂജ നടത്തിയതിന്റെ ലക്ഷണങ്ങളാണിതെന്ന് പോലീസ് പറഞ്ഞു. മുറി നിറയെ മുടി വിതറിയിട്ടുണ്ടായിരുന്നു.
ഡോഗ് സ്ക്വാഡ് മണം പിടിക്കാതിരിക്കാനാണ് ഇങ്ങനെ ചെയ്തതെന്നാണ് പോലീസിന്റെ നിഗമനം. ബാങ്കിന്റെ ലോക്കർ കുത്തി തുറന്നാണ് മോഷണം നടത്തിയത്. ഡോഗ് സ്ക്വാഡും ഫൊറൻസിക് വിദഗ്ധരും സംഭവ സ്ഥലത്തെത്തി പരിശോധന നടത്തി. അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
Comments