കൊൽക്കത്ത: സിപിഐഎമ്മിനെ പ്രതിരോധത്തിലാക്കി ആരോപണവുമായി പശ്ചിമബംഗാൾ മുഖ്യമന്ത്രി മമത ബാനർജി. സിപിഐഎം ഭരണകാലത്തെ നിയമനങ്ങളിലെ അനധികൃത ഇടപെടലുകൾ പുറത്തുവിടുമെന്ന് മമത ഭീഷണിപ്പെടുത്തി.
സർക്കാർ സ്കൂൾ നിയമന അഴിമതിയുമായ ബന്ധപ്പെട്ട് തൃണമൂൽ കോൺഗ്രസ് സെക്രട്ടറി ജനറൽ പാർത്ഥ ചാറ്റർജിയുടെ പേര് ചർച്ചയാകുന്നതിനിടെയാണ് സിപിഐഎമ്മിന് നേരെ ഭീഷണിയുമായി മമതയെത്തിയത്. ജംഗൽ മഹലിലെ ജാർഗ്രമിൽ തൃണമൂലിന്റെ റാലിയിൽ പങ്കെടുക്കുകയായിരുന്നു മമത.
വെറും കടലാസിൽ എഴുതിക്കൊടുത്ത് സിപിഐഎം വേണ്ടപ്പെട്ടവർക്ക് സർക്കാർ ജോലികൾ വാങ്ങിക്കൊടുത്തിട്ടുണ്ട്.ഇത് വരെ അക്കാര്യങ്ങളൊന്നും പുറത്തു വിടാതിരുന്നത് രാഷ്ട്രീയ മര്യാദയെ കരുതിയാണെന്ന് മമത തുറന്നടിച്ചു. പക്ഷേ ഇപ്പോൾ മുതൽ ഓരോന്നായി പുറത്തു വിടുമെന്ന് മമത ബാനർജി കൂട്ടിച്ചേർത്തു.
ബംഗാൾ രാഷ്ട്രീയത്തിൽ രണ്ട് സഹോദരൻമാരുണ്ട്. ബംഗാളിലെ വോട്ടർമാർക്ക് അതറിയാം. ഈ രണ്ട് പാർട്ടികളും വികസനപ്രവർത്തനങ്ങളെ തടയാൻ ശ്രമിക്കുന്നു. പക്ഷെ തൃണമൂൽ കോൺഗ്രസ് നിർത്തുകയില്ലന്ന് മമത വ്യക്തമാക്കി.
Comments