മുംബൈ: പഞ്ചനക്ഷത്ര ഹോട്ടലിലെ ശുചിമുറിയിൽ പ്രസവിച്ച ശേഷം കുഞ്ഞിനെ ചവറ്റുകുട്ടയിൽ ഉപേക്ഷിച്ച 41-കാരി അറസ്റ്റിൽ. മുംബൈയിലെ പഞ്ചനക്ഷത്ര ഹോട്ടലിൽ തിങ്കളാഴ്ചയായിരുന്നു സംഭവം.
രാവിലെ 10.30-ഓടെ ഹൗസ് കീപ്പിംഗ് സ്റ്റാഫ് വൃത്തിയാക്കാൻ എത്തിയപ്പോഴാണ് കുഞ്ഞിനെ കണ്ടത്. ശുചിമുറിയിൽ നിന്നും കരച്ചിൽ കേട്ട് നോക്കിയപ്പോൾ നവജാതശിശുവിനെ കണ്ടെത്തുകയായിരുന്നു.
ഇതിന് പിന്നാലെ ഉടൻ തന്നെ ഹോട്ടൽ ജീവനക്കാർ കുഞ്ഞിനെ ആശുപത്രിയിൽ എത്തിച്ചു. കുട്ടികളുടെ തീവ്രപരിചരണ വിഭാഗത്തിലാണ് കുഞ്ഞ് കഴിയുന്നത്. 2.8 കിലോഗ്രാം തൂക്കമുള്ള ആൺകുഞ്ഞിന്റെ ആരോഗ്യനില നിലവിൽ തൃപ്തികരമാണെന്ന് ആശുപത്രി അധികൃതർ വ്യക്തമാക്കി.
ജോലിക്കാര്യത്തിനായാണ് ഹോട്ടലിലേക്ക് എത്തിയതെന്നും പെട്ടെന്ന് പ്രസവവേദന അനുഭവപ്പെടുകയായിരുന്നുവെന്നും കുഞ്ഞിന്റെ അമ്മ പോലീസിനെ അറിയിച്ചു. തുടർന്ന് കുട്ടിയെ ഹോട്ടലിന്റെ ശുചിമുറിയിൽ പ്രസവിക്കുകയായിരുന്നു. ഭർത്താവുമായുള്ള തർക്കം കാരണമാണ് കുഞ്ഞിനെ ഉപേക്ഷിച്ചതെന്നും യുവതി വെളിപ്പെടുത്തി.
