പാരീസ്: കളിമൺ കോർട്ടിൽ താൻ തന്നെ രാജാവെന്ന് തെളിയിച്ച് നദാലിന്റെ മുന്നേറ്റം. ഫ്രഞ്ച് ഓപ്പണിൽ റാഫേൽ നദാൽ ജോക്കോവിച്ചിനെ തകർത്തു. ഇരുവരും തമ്മിലുള്ള 59-ാംമത്തെ പോരാട്ടത്തിലാണ് നദാൽ ലോക ഒന്നാം നമ്പറിനെതിരെ 29-ാംമത്തെ ജയം നേടിയത്.
ഒന്നിനെതിരെ മൂന്ന് സെറ്റുകൾക്കാണ് സ്പാനിഷ് കരുത്തൻ സെർബിയൻ താരത്തെ മുട്ടുകുത്തിച്ചത്. ആദ്യ സെറ്റ് 6-2ന് നേടിയ നദാലിനെതിരെ രണ്ടാം സെറ്റ് 4-6ന് ജോക്കോവിച്ച് തിരിച്ചു പിടിച്ചു. എന്നാൽ മൂന്നാം സെറ്റ് 6-2ന് അതിവേഗം സ്വന്തമാക്കിയ നദാൽ നിർണ്ണായകമായ മൂന്നാം സെറ്റിനെ ടൈബ്രേക്കറിലൂടെ 7-6ന് സ്വന്തമാക്കിയാണ് സെമിയിലേക്ക് കുതിച്ചത്.
13 തവണ ഫ്രഞ്ച് ഓപ്പൺ സ്വന്തമാക്കിയിട്ടുള്ള നദാൽ പതിനഞ്ചാം തവണയാണ് സെമിയിൽ കടക്കുന്നത്. സെമിയിൽ ജർമ്മൻ താരം അലക്‌സാണ്ടർ സ്വരേവാണ് നദാലിന്റെ എതിരാളി. നദാലിന്റെ പിൻമുറക്കാരനെന്ന് വിശേഷിപ്പിക്കുന്ന സ്‌പെയിനിന്റെ കൗമാര താരം അൽക്കറാസിനെ 6-4,6-4,4-6,7-6ന് തോൽപ്പിച്ചാണ് സ്വരേവ് സെമിയിലെത്തിയത്.
