ഫിലിപ്പൈൻസുമായുളള സാംസ്കാരിക ബന്ധം ദൃഢമാക്കുതിന്റെ ഭാഗമായി ജാതക കഥകളെ പുനരവതരിപ്പിക്കാനൊരുങ്ങുകയാണ് ഇന്ത്യ. ബുദ്ധസാഹിത്യത്തിലെ പ്രധാന വിഭാഗങ്ങളിലൊന്നാണ് ജാതക കഥകൾ. ബുദ്ധൻ ജ്ഞാനോദയം നേടുന്നതും ബുദ്ധന്റെ പൂർവ്വ ജന്മത്തിൽ നടന്ന സംഭവങ്ങളുമാണ് ജാതക കഥകളിൽ പറയുന്നത്. ബുദ്ധൻ ബുദ്ധനായും, നായകനായും, വേഷപകർച്ചകൾ നടത്തിയും, നിരീക്ഷകനായുമെല്ലാം പ്രത്യക്ഷപ്പെട്ട് ഉപദേശങ്ങൾ നൽകി ജനങ്ങളെ നേർവഴിക്ക് നയിക്കുന്നതാണ് ജാതക കഥകൾ. ഇന്ത്യൻ സാഹിത്യത്തിലെ ഏറ്റവും പഴക്കം ചെന്ന വിഭാഗങ്ങളിലൊന്നായ ജാതക കഥകളെ ഇപ്പോൾ ഫിലിപ്പൈൻസ് ഭാഷയിൽ പോഡ്കാസ്റ്റ് രൂപത്തിൽ പുറത്തിറക്കുകയാണ് ഇന്ത്യ.
മനിലയിലെ ഇന്ത്യൻ എംബസി, അരീറ്റ് അറ്റേനിയോയുടെ(Areté Ateneo) പങ്കാളിത്തത്തോടെയാണ് ഹ്രസ്വവും ആകർഷകവുമായ 12 പോഡ്കാസ്റ്റുകളുടെ ഒരു പരമ്പര ഒരുക്കിയിരിക്കുന്നത്. തീർത്തും സൗജന്യമായി ഡൗൺലോഡ് ചെയ്ത് കഥകൾ ആസ്വദിക്കാനുള്ള അവസരമാണ് ഇന്ത്യ ഒരുക്കിയിരിക്കുന്നത്. ലോകമെമ്പാടുമുള്ള കുട്ടികളെ ആകർഷിക്കാൻ ഇതിലൂടെ കഴിയുമെന്നാണ് ഇതിന് പിന്നിൽ പ്രവർത്തിച്ചവരുടെ വിശ്വാസം. ഒട്ടനവധി അവിസ്മരണീയ കഥാപാത്രങ്ങൾ വന്ന് പോകുന്നതും മികച്ച കാഴ്ചാനുഭവവും കുട്ടികളെ ഇതിലേക്ക് ആകർഷിക്കും. ബുദ്ധന്റെ ജീവിത കഥകൾ പറയുന്നതോടൊപ്പം കുട്ടികളിൽ നന്മയും ധാർമ്മികതയും ലക്ഷ്യബോധവും വളർത്തുവാൻ ഇതിലൂടെ സാധിക്കും.
സംരംഭത്തിന് ആശയം നൽകിയതും പണം മുടക്കിയതും മനിലയിലെ ഇന്ത്യൻ എംബസിയാണ്. കഥകളുടെ വിവർത്തനം, ചിത്രീകരണം, പോഡ്കാസ്റ്റുകളുടെ നിർമ്മാണം എന്നിവ അരീറ്റ് അറ്റേനിയോയും, അറ്റെനിയോ ഡി മനില സർവ്വകലാശാലയിലെ ഫിലിപ്പിനോ ഭാഷാ വകുപ്പും ചേർന്നാണ് നിർവ്വഹിച്ചിരിക്കുന്നത്. ഫിലിപ്പൈൻസിനെയും ഇന്ത്യയെയും ബന്ധിപ്പിക്കുന്ന ഇഴകൾ വീണ്ടും കണ്ടെത്തുന്നതിന്റെ ഭാഗമാണ് പുതിയ സംരംഭമെന്ന് ഫിലിപ്പൈൻസിലെ ഇന്ത്യൻ അംബാസിഡർ ശംഭുകുമാരൻ പറയുന്നു.
ഭാരതത്തിന്റെ മാത്രമായ ഇത്തരം മഹത്തായ കഥകളെ ദേശീയ പാഠ്യപദ്ധതിയിൽ ഉൾപ്പെടുത്തുന്നത് മികച്ചതായിരിക്കുമെന്ന് ജാതക കഥകളിലൂടെ പഠിക്കാൻ കഴിയുന്ന പാഠങ്ങളും സാർവ്വത്രിക മൂല്യങ്ങളും ചൂണ്ടിക്കാട്ടി ശംഭുകുമാരൻ പറയുന്നു. ഇത്തരം കഥകൾ ഉൾപ്പെടുത്തുന്നത് പരിഗണിക്കുകയാണെങ്കിൽ വിദ്യാഭ്യാസ വകുപ്പുമായി പങ്കാളിത്തത്തിന് തയ്യാറാണെന്നും അദ്ദേഹം ചൂണ്ടിക്കാട്ടുന്നു.
Comments