സ്ഥിരമായി ഓൺലൈൻ ക്ലാസിലിരുന്ന പൂച്ചയ്‌ക്കും ബിരുദമോ? ഒരു ഇൻസ്റ്റഗ്രാം അക്കൗണ്ട് തുടങ്ങിക്കൂടെ എന്ന് ആരാധകർ

കൊറോണ മഹാമാരിയെ തുടർന്ന് ലോകത്തുടനീളം ലോക്ഡൗൺ ഏർപ്പെടുത്തിയപ്പോൾ ഭൂരിഭാഗം സ്‌കൂളുകളും കോളേജുകളും ഓൺലൈൻ പഠനത്തിലേക്ക് തിരഞ്ഞിരുന്നു. സൂം,ഗൂഗിൾ മീറ്റ് തുടങ്ങിയ ആപ്പുകൾ ഉപയോഗിച്ച് അന്ന് താൽക്കാലികമായി തുടങ്ങിയ ക്ലാസുകൾ ഇപ്പോൾ ഔദ്യോഗികമായി തുടരുന്ന വിദ്യാഭ്യാസ സ്ഥാപനങ്ങളുണ്ട്.

കൊറോണമഹാമാരിയ്‌ക്കിടെ ഓൺലൈൻ ക്ലാസുകളിലൂടെ പലരും ബിരുദങ്ങൾ വരെ നേടി. എന്നാലിപ്പോൾ സ്ഥിരമായി കോളേജിലെ സൂം ക്ലാസിലും പങ്കെടുത്ത് ബിരുദധാരിയായ ഒരു പൂച്ചയുടെ വിശേഷങ്ങളാണ് ഇപ്പോൾ സമൂഹമാദ്ധ്യമങ്ങളിൽ നിറയുന്നത്. യുഎസിലെ ടെക്‌സസ് സർവ്വകലാശാല ബിരുദ വിദ്യാർത്ഥിനിയായ ഫ്രാൻസെസ ബോർഡിയർ ആണ് തന്റെ പൂച്ചയും ബിരുദധാരിയായെന്ന് പറയുന്നത്.

തന്റെ വളർത്തുപൂച്ചയായ സുകി തന്നോടൊപ്പം എല്ലാ സൂം ക്ലാസിലും മുടങ്ങാതെ പങ്കെടുക്കുമായിരുന്നുവെന്നും വളരെ ശ്രദ്ധയോടെയാണ് സുകി ക്ലാസിലിരിക്കാറെന്നും ഫ്രാൻസെസ പറയുന്നു. അതിനാൽ ഒരു യൂണിവേഴ്‌സിറ്റി ബിരുദധാരിയാവാൻ സുകിയും അർഹയായെന്ന് പെൺകുട്ടി പറഞ്ഞു. ബിരുദദാനചടങ്ങിൽ ഫ്രാൻസെസയോടൊപ്പം സുകിയും ബാച്ചിലേഴ്‌സ് ഗൗണ്ടും തൊപ്പിയും അണിഞ്ഞ് പങ്കെടുത്തു.

ഇതിന്റെ വീഡിയോയും ഫോട്ടോകളും ഇപ്പോൾ സമൂഹമാദ്ധ്യമങ്ങളിൽ വൈറലാണ്. ബിരുദധാരിയായ പൂച്ച എന്നത് അസംബന്ധമായ കാര്യമാണെന്ന് പലരും അഭിപ്രായപ്പെടുന്നുണ്ടെങ്കിലും പൂച്ചയ്‌ക്ക് ആരാധകരും ഏറെയാണ്. സുകിയ്‌ക്ക് മാത്രമായി ഒരു ഇൻസ്റ്റഗ്രാം അക്കൗണ്ട് തുടങ്ങിക്കൂടെ എന്നാണ് ആരാധകരിൽ പലരും ഫ്രാൻസെസയോട് ചോദിക്കുന്നത്.