പത്തനംതിട്ട: കോന്നിയിൽ 85-കാരിയെ പീഡിപ്പിച്ച സിഐടിയു പ്രവർത്തകൻ അറസ്റ്റിൽ. വൃദ്ധയുടെ കൊച്ചുമകളുടെ ഭർത്താവും അരുവാപ്പുലം സ്വദേശിയുമായ സിഐടിയു പ്രവർത്തകനാണ് സംഭവത്തിൽ അറസ്റ്റിലായത്. കോന്നി പോലീസാണ് പ്രതി ശിവദാസനെ (55) പിടികൂടിയത്.
അംഗനവാടി ജീവനക്കാരിയോട് വയോധിക പരാതി പറഞ്ഞതോടെയായിരുന്നു സംഭവം പുറത്തറിഞ്ഞത്. തുടർന്ന് വിവരം പോലീസിനെ അറിയിക്കുകയായിരുന്നു. മെയ് 10നായിരുന്നു കേസിനാസ്പദമായ സംഭവം.
കോന്നിയിലെ അരുവാപ്പുലത്തെ വീട്ടിലാണ് കൊച്ചുമകളുടെ ഭർത്താവായ ശിവദാസൻ വയോധികയെ ലൈംഗിക പീഡനത്തിന് ഇരയാക്കിയത്. തുടർന്ന് കുടുംബാംഗങ്ങളോട് വിവരം പറഞ്ഞപ്പോൾ പുറത്ത് പറയരുതെന്ന് ഭീഷണിപ്പെടുത്തിയെന്നാണ് മൊഴി. അയൽവീട്ടുകാരോടും വയോധിക വിവരം പറഞ്ഞെങ്കിലും ആരും സഹായിച്ചില്ല. ഒടുവിലാണ് അംഗനവാടിയിലെ ജീവനക്കാരിയെ വിവരമറിയിച്ചത്.
തുടർന്ന് അംഗനവാടി ജീവനക്കാരിയുമായി കോന്നി പോലീസ് സ്റ്റേഷനിലെത്തിയ വയോധിക പരാതി നൽകുകയായിരുന്നു. പോലീസ് നടത്തിയ ചോദ്യം ചെയ്യലിൽ പ്രതി കുറ്റം സമ്മതിച്ചു. ശിവദാസനെ കോടതിയിൽ ഹാജരാക്കുമെന്ന് കോന്നി പോലീസ് വ്യക്തമാക്കി.
