മുംബൈ:ബോളിവുഡ് നടൻ സൽമാൻഖാനും പിതാവ് സലീം ഖാനും വധഭീഷണിയുണ്ടായ സംഭവത്തിൽ നടന്റെ മൊഴിയിലെ വിവരങ്ങൾ പുറത്ത്. ലോറൻസ് ബിഷ്ണോയിയെ എല്ലാവർക്കും അറിയുന്നത് പോലെ തനിക്ക് അറിയാമെന്നും എന്നാൽ ഗോൾഡി ബ്രാറിനെക്കുറിച്ച് തനിക്ക് അറിയില്ലെന്നും നടൻ പറഞ്ഞു. ഗുണ്ടാസംഘങ്ങളായ ലോറൻസ് ബിഷ്ണോയി, ഗോൾഡി ബ്രാർ എന്നിവരുമായി എന്തെങ്കിലും ബന്ധമുണ്ടോയെന്ന ചോദ്യത്തിനായിരുന്നു താരത്തിന്റെ മറുപടി.
സൽമാനെ ദ്രോഹിക്കാൻ ആഗ്രഹിക്കുന്ന ആരെങ്കിലും ഉണ്ടോ എന്നത് സംബന്ധിച്ച ചോദ്യത്തിന് ‘ എനിക്കാരെയും സംശയിക്കേണ്ട കാര്യമില്ലെ’ന്നായിരുന്നു താരം മറുപടി നൽകിയത്. കഴിഞ്ഞ ദിവസം ലഭിച്ച കത്തിന് പുറമെ മറ്റ് ഭീഷണിയുണ്ടായിട്ടുണ്ടോ എന്ന പോലീസിന്റെ ചോദ്യത്തിന് വ്യക്തമായ മറുപടി നൽകിയില്ലെന്നും തനിക്കോ തന്റെ കുടുംബത്തിലെ ആർക്കും അടുത്തിടെ വധഭീഷണിയില്ലെന്ന് അദ്ദേഹം പറഞ്ഞതുമായാണ് വിവരം.
കഴിഞ്ഞ ദിവസമാണ് സൽമാനും പിതാവിനുമെതിരെ വധ ഭീഷണി ഉണ്ടായത്. ബാന്ദ്ര ബസ് സ്റ്റാൻഡ് പരിസരത്ത് നിന്നും കത്ത് മുഖാന്തരമാണ് താരത്തിനെതിരെ ഭീഷണി. ‘മൂസെവാലയുടെ അവസ്ഥ തന്നെയാകും’ എന്നാണ് കത്തിൽ ഭീഷണിപ്പെടുത്തുന്നത്.
Comments