ന്യൂഡൽഹി: ഇന്ത്യയിലെ പ്രധാന നഗരങ്ങളിൽ ആക്രമണം നടത്തുമെന്ന ഭീകര സംഘടന അൽ-ഖ്വായ്ദയുടെ ഭീഷണിയുടെ പശ്ചാത്തലത്തിൽ സുപ്രധാന കേന്ദ്ര ഏജൻസികൾ ജാഗ്രത തുടരുന്നു. ഡൽഹി, മുംബൈ, ഉത്തർ പ്രദേശ്, ഗുജറാത്ത് എന്നിവിടങ്ങളിൽ ചാവേർ ആക്രമണം നടത്തും എന്നാണ് ഭീഷണി. പ്രവാചകന്റെ അഭിമാനത്തിനായി പോരാടും എന്നാണ് ഭീഷണി സന്ദേശത്തിൽ പറഞ്ഞിരിക്കുന്നത്.
ഭീഷണിയുടെ പശ്ചാത്തലത്തിൽ പ്രസ്തുത നഗരങ്ങളിലെ എയർപോർട്ടുകൾ, മെട്രോ- റെയിൽവേ സ്റ്റേഷനുകൾ, പ്രധാന വാണിജ്യ കേന്ദ്രങ്ങൾ എന്നിവിടങ്ങളിൽ സുരക്ഷ ശക്തമാക്കി. സംശയാസ്പദമായ സാഹചര്യത്തിൽ എന്ത് ശ്രദ്ധയിൽ പെട്ടാലും ഉന്നത ഉദ്യോഗസ്ഥരെ അറിയിക്കാൻ സുരക്ഷാ ഉദ്യോഗസ്ഥർക്ക് നിർദ്ദേശം നൽകി.
നൂപുർ ശർമ്മ പ്രവാചകനിന്ദ നടത്തി എന്ന കുപ്രചാരണത്തിന്റെ തുടർച്ചയായാണ് അൽ-ഖ്വായ്ദയുടെ ഭീഷണി. കുട്ടികളെയും ചാവേറായി ഉപയോഗിക്കുമെന്നും ഭീഷണി സന്ദേശത്തിൽ പറയുന്നു.
