അഹമ്മദാബാദ് : സോളാഗാമി വിവാഹത്തിന് സാക്ഷിയായി രാജ്യം. താൻ സോളാഗാമിയാണെന്ന് പ്രഖ്യാപിച്ച യുവതി ഒടുവിൽ സ്വയം വിവാഹിതയായി. ഗുജറാത്ത് സ്വദേശിയായ 24കാരി ക്ഷമബിന്ദുവാണ് പങ്കാളിയെ വേണ്ടെന്ന് തീരുമാനിച്ച് സ്വയം വിവാഹം ചെയ്തത്.
എല്ലാ പരമ്പരാഗത ആചാരങ്ങളോടും കൂടി ജൂൺ 10നായിരുന്നു വിവാഹം. ഗുജറാത്തിലെ ആദ്യ സോളോഗാമി വിവാഹമാണിതെന്നാണ് റിപ്പോർട്ട്. മെഹന്തി, ഹൽദി തുടങ്ങിയ വിവാഹ ചടങ്ങുകളും സോളാഗാമിയായ ക്ഷമയുടെ വിവാഹത്തിന് സംഘടിപ്പിച്ചിരുന്നു. തന്റെ വിശ്വാസത്തോടൊപ്പം നിന്ന, തന്നെ പിന്തുണച്ച എല്ലാവർക്കും നന്ദിയുണ്ടെന്ന് ക്ഷമ വിവാഹത്തിന് ശേഷം പ്രതികരിച്ചു. ഹണിമൂൺ ഗോവയിലേക്കാണ് പോകാൻ തീരുമാനിച്ചിരിക്കുന്നത് എന്നും ക്ഷമ കൂട്ടിച്ചേർത്തു.
താൻ ഒരിക്കലും വിവാഹം കഴിക്കാൻ ആഗ്രഹിച്ചിട്ടില്ലെന്ന് ക്ഷമ പറയുന്നു. പക്ഷെ വധുവാകാൻ ആഗ്രഹമുണ്ടായിരുന്നു. അതുകൊണ്ടാണ് സ്വയം വിവാഹം കഴിക്കാൻ തീരുമാനിച്ചതെന്ന് ക്ഷമ നേരത്തെ തന്നെ വ്യക്തമാക്കിട്ടുണ്ട്. ”സ്വയം വിവാഹം എന്നത് തന്നോട് തന്നെയുള്ള നിരുപാധികമായ സ്നേഹമാണ്. അത് സ്വയം അംഗീകരിക്കാനുള്ള ഒരു മനസാണ്. ആളുകൾ അവർ ഇഷ്ടപ്പെടുന്ന ഒരാളെ വിവാഹം കഴിക്കുന്നു. ഞാൻ എന്നെത്തന്നെ സ്നേഹിക്കുന്നു, അതിനാൽ ഞാൻ എന്നെ വിവാഹം കഴിച്ചു.” ക്ഷമ പറഞ്ഞു.
