ന്യൂഡൽഹി: മഹാരാഷ്ട്ര രാജ്യസഭാ തിരഞ്ഞെടുപ്പിലെ ബിജെപിയുടെ മികച്ച വിജയം തന്നെ അത്ഭുതപ്പെടുത്തുന്നില്ലെന്ന് എൻസിപി അദ്ധ്യക്ഷൻ ശരദ് പവാർ. ആറിൽ മൂന്ന് സീറ്റുകളും ബിജെപിക്ക് നേടാൻ സാധിച്ചത് സ്വതന്ത്രരുടെ വോട്ടുകൾ കൂടി ലഭിച്ചത് കൊണ്ടാണ്. ദേവേന്ദ്ര ഫഡ്നവിസിന്റെ ഇടപെടലുകളാണ് സ്വതന്ത്രരുടെ പിന്തുണ ഉറപ്പിയ്ക്കാൻ ബിജെപിയെ സഹായിച്ചത്. അതായിരുന്നു തെരഞ്ഞെടുപ്പിൽ നിർണായകമായതെന്നും പവാർ പറഞ്ഞു.
മഹാരാഷ്ട്ര രാജ്യസഭാ തിരഞ്ഞെടുപ്പിൽ കേന്ദ്രമന്ത്രി പിയൂഷ് ഗോയൽ, മുൻ സംസ്ഥാന മന്ത്രി അനിൽ ബോന്ദെ, ധനഞ്ജയ് മഹാദിക് എന്നിവരാണ് വിജയിച്ച ബിജെപി സ്ഥാനാർത്ഥികൾ. രാജ്യസഭയിലേക്ക് മൂന്ന് സ്ഥാനാർത്ഥികളെ വിജയിപ്പിക്കാൻ സാധിച്ചതിൽ അതിയായ സന്തോഷമുണ്ടെന്ന് ബിജെപി നേതാവ് ദേവേന്ദ്ര ഫഡ്നവിസ് പറഞ്ഞു. ആറാം സീറ്റിലേക്ക് അതിശക്തമായ മത്സരമാണ് നടന്നത്. ശിവസേനയുടെ സഞ്ജയ് പവാറിനെ പരാജയപ്പെടുത്തിയാണ് ബിജെപി സ്ഥാനാർത്ഥി ധനഞ്ജയ് മഹാദിക് വിജയിച്ചത്.
