കോഴിക്കോട്: ഫാൻസി മിഠായി കഴിച്ച ഏഴ് വിദ്യാർത്ഥികൾക്ക് ഭക്ഷ്യ വിഷബാധയുണ്ടായതായി പരാതി. നാദാപുരം കല്ലാച്ചി സ്കൂൾ പരിസരത്തെ കടകളിൽ നിന്ന് വാങ്ങി കഴിച്ച മിഠായികളിൽ നിന്നാണ് വിദ്യാർത്ഥികൾക്ക് ഭക്ഷ്യ വിഷബാധയേറ്റത്. സ്കൂൾ പരിസരത്തെ കടകളിൽ ആരോഗ്യ വകുപ്പ് നടത്തിയ പരിശോധനയിൽ ഗുണനിലാവരമില്ലാത്ത മിഠായികളും പിടിച്ചെടുത്തു.
ഇന്ന് ഉച്ചയോടെയാണ് നാദാപുരം കല്ലാച്ചി ഗവ. യുപി സ്കൂൾ പരിസരത്തെ കടകളിൽ നിന്ന് മിഠായി കഴിച്ച വിദ്യാർത്ഥികൾക്ക് ഭക്ഷ്യ വിഷബാധയുണ്ടായത്. തുടർന്ന് പനി, തലവേദന, വയറുവേദന തുടങ്ങിയവ അനുഭവപ്പെടുകയും വിദ്യാർത്ഥികളെ നാദാപുരം താലൂക്ക് ആശുപത്രിയിൽ പ്രവേശിപ്പിക്കുകയും ചെയ്തു. പ്ലാസ്റ്റിക്ക് കവറിൽ ലഭിക്കുന്ന പോപ് സ്റ്റിക്ക് എന്ന അധിമധുര മിഠായി ആയിരുന്നു കുട്ടികൾ കഴിച്ചത്.
ഭക്ഷ്യ വിഷബാധയെ തുടർന്ന് ആരോഗ്യവകുപ്പ് നടത്തിയ പരിശോധനയിൽ ഗുണനിലവാരം കുറഞ്ഞതും നിർമ്മിച്ച കമ്പനിയുടെ പേര് രേഖപ്പെടുത്താതുമായ മിഠായികൾ കണ്ടെടുത്തു. നാദാപുരം ഹെൽത്ത് ഇൻസ്പെക്ടർ സുരേന്ദ്രൻ കല്ലേരിയുടെ നേതൃത്വത്തിലായിരുന്നു പരിശോധന.
Comments