കോഴിക്കോട്: മുഖ്യമന്ത്രിക്കെതിരായ പ്രതിഷേധങ്ങളുടെ പേരിൽ കോൺഗ്രസ് ഓഫീസുകൾക്ക് നേരെ ഉണ്ടായ ആക്രമണങ്ങളെ രൂക്ഷമായി വിമർശിച്ച് കെ.മുരളീധരൻ. ‘ വിമാനത്തിൽ കോൺഗ്രസ് പ്രവർത്തകർ മുദ്രാവാക്യം മുഴക്കി പ്രതിഷേധിക്കുക മാത്രമാണ് ചെയ്തത്. വാക്കുകളിലൂടെ മാത്രമുള്ള പ്രതിഷേധം തെറ്റല്ല. പ്രതിഷേധിച്ചവരെ വിമാനത്തിനുള്ളിൽ വച്ച് ഇ.പി.ജയരാജൻ ചവിട്ടി. ഇ.പിക്കെതിരെ കേസെടുക്കണം. കേരള പോലീസ് കേസ് എടുക്കില്ല. കേന്ദ്ര ആഭ്യന്തര മന്ത്രാലയത്തിനും, സിവിൽ ഏവിയേഷനും പരാതി നൽകുന്ന കാര്യം ആലോചിച്ച് തീരുമാനിക്കും’.
‘ ഗാന്ധി പ്രതിമയുടെ തല സിപിഎമ്മുകാർ വെട്ടി. മുഖ്യമന്ത്രിയെ സംരക്ഷിക്കും എന്നാണ് സിപിഎം പറയുന്നത്. ആഭ്യന്തര വകുപ്പ് പരാജയമാണെന്നതിന്റെ തെളിവാണിത്. വിമാനത്തിനുള്ളിൽ പ്രതിഷേധിച്ചവർ ജനവികാരമാണ് കാണിച്ചത്. അവരെ പാർട്ടി സംരക്ഷിക്കും. തെരുവിൽ നേരിട്ടാൽ തിരിച്ചും നേരിടും. നാട്ടിൽ സമാധാനം ഉണ്ടാക്കേണ്ടത് പ്രതിപക്ഷത്തിന്റെ ഉത്തരവാദിത്വമല്ല. ഭരിക്കുന്നവരാണ് ജനങ്ങൾക്ക് സുരക്ഷ ഒരുക്കേണ്ടത്. ഇനി ഗാന്ധിസം പറഞ്ഞിട്ട് കാര്യമില്ല. പോലീസിൽ പരാതിപ്പെടാനുമില്ല. അടിച്ചാൽ ഇനി തിരിച്ചടിയാണെന്നും’ കെ.മുരളീധരൻ പറഞ്ഞു.
