ന്യൂഡല്‍ഹി: ഫോട്ടോഗ്രഫറുടെ ജീവന്‍ രക്ഷിച്ച് കേന്ദ്രമന്ത്രി ഡോ. ഭഗവത് കൃഷ്ണറാവു കരാട്.ഡല്‍ഹി താജ് മാന്‍സിങില്‍ ഒരു പരിപാടിയില്‍ പങ്കെടുക്കാന്‍ എത്തിയ ഫോട്ടോഗ്രാഫര്‍ ജോലിക്കിടെ കുഴഞ്ഞുവീഴുകയായിരുന്നു.
സംഭവം ശ്രദ്ധയില്‍പെട്ട ഡോ ഭഗവത് കൃഷ്ണറാവു ഉടന്‍ ഓടിയെത്തി. പള്‍സ് കുറഞ്ഞതാണെന്ന് മനസിലാക്കി കാലുകളില്‍ അമര്‍ത്തി പള്‍സ് നിരക്ക് വര്‍ധിപ്പിക്കാന്‍ വര്‍ധിപ്പിക്കാന്‍ ശ്രമിച്ചു. അല്‍പനേരത്തിന് ശേഷം പള്‍സ് നിരക്ക് സാധാരണ നിലയിലെത്തി. ഗ്ലൂക്കോസ് നില വര്‍ധിപ്പിക്കുന്നതിനായി മധുരവും നല്‍കി.
മന്ത്രിയുടെ പ്രവര്‍ത്തി പ്രശംസ അര്‍ഹിക്കുന്നതാണെന്നും മനുഷ്യത്വത്തിന്റെ ഉദാഹരണവുമാണെന്നും നിരവധി പേര്‍ ട്വിറ്ററില്‍ കുറിച്ചു. സ്വാമി റാംദേവ്, തരുണ്‍ ശര്‍മ, പൃഥി ഗാന്ധി തുടങ്ങിയവര്‍ ചിത്രങ്ങള്‍ പങ്കുവെച്ചു.
നേരത്തെയും വിമാനയാത്രയ്‌ക്കിടെ നിര്‍ണായക ഘട്ടത്തില്‍ മന്ത്രി സഹയാത്രികന് തുണയായിരുന്നു. വിമാനം പുറപ്പെട്ട് ഒരു മണിക്കൂര്‍ പിന്നിടുമ്പോള്‍ ശാരീരിക അസ്വാസ്ഥ്യം പ്രകടിപ്പിച്ച യാത്രക്കാരനാണ് മന്ത്രി മെഡിക്കല്‍ സഹായം നല്‍കിയത്. യാത്രക്കാരന്റെ ബുദ്ധിമുട്ട് മനസിലായ വിമാനജീവനക്കാര്‍ യാത്രക്കാരില്‍ ഡോക്ടര്‍മാരുണ്ടോയെന്ന് തിരക്കുകയുമായിരുന്നു. ഇതോടെ മന്ത്രി യാത്രക്കാരന്റെ രക്ഷയ്‌ക്കെത്തുകയായിരുന്നു.’ഹൃദയത്തില്‍ എന്നുമൊരു ഡോക്ടറാണ്’എന്നാണ് പ്രധാനമന്ത്രി നരേന്ദ്രമോദി അദ്ദേഹത്തെ വിശേഷിപ്പിച്ചത്.
മഹാരാഷ്‌ട്രയില്‍ നിന്നുള്ള രാജ്യ സഭാ എംപിയാണ് ഡോ. ഭഗവത് കൃഷ്ണറാവു കരാട്. 2012 ജൂലൈയിലാണ്് മന്ത്രിസഭയില്‍ അംഗമായത്. ഔറംഗബാദിലെ മേയറായിരുന്ന കരാടിന് അവിടെ സ്വന്തമായി ഒരു ആശുപത്രിയുമുണ്ട്. നിലവില്‍ ധനകാര്യ സഹമന്ത്രിയാണ് അദ്ദേഹം.
