ജനപ്രിയ സമൂഹമാദ്ധ്യമമായ വാട്സാപ്പിൽ ഉപയോക്താക്കൾ കാത്തിരുന്ന ഫീച്ചറുകൾ എത്തിയതായി റിപ്പോർട്ട്. ഇൻസ്റ്റന്റ് മെസേജിങ് ആപ്ലിക്കേഷനായ വാട്സാപ്പിലുള്ള ലാസ്റ്റ് സീൻ ഫീച്ചറിലാണ് പുതിയ മാറ്റം വന്നിരിക്കുന്നത്.
ഏറെ നാളുകളായുള്ള പരിശ്രമങ്ങളുടെ ഫലമായാണ് പുതിയമാറ്റം ഏർപ്പെടുത്തിയതെന്ന് അധികൃതർ ചൂണ്ടിക്കാട്ടുന്നു. ഇനി ഇഷ്ടമുള്ളവരെ മാത്രം ലാസ്റ്റ് സീനും സ്റ്റാറ്റസ് അപ്ഡേറ്റുകളും കാണിക്കാവുന്ന വിധം വാട്സാപ്പ് സെറ്റ് ചെയ്യാമെന്നാണ് റിപ്പോർട്ടുകൾ സൂചിപ്പിക്കുന്നത്.
ഓൺലൈനിൽ നിങ്ങൾ എപ്പോഴാണ് ഒടുവിൽ വന്ന് പോയത് എന്ന് സൂചിപ്പിക്കുന്നതാണ് വാട്സാപ്പിലെ ലാസ്റ്റ് സീൻ. നിങ്ങളുടെ പ്രൊഫൈൽ ഫോട്ടോ, ലാസ്റ്റ് സീൻ, സ്റ്റാറ്റസ് അപ്ഡേറ്റ് എന്നിവ കോൺടാക്ട് ലിസ്റ്റിലുള്ള ആരെല്ലാം കാണണമെന്ന് ഇനി മുതൽ നിങ്ങൾക്ക് തന്നെ തീരുമാനിക്കാം. ‘മൈ കോൺടാക്ട്സ് എക്സെപ്റ്റ്’ എന്ന ഓപ്ഷൻ കൂടി നിലവിൽ വന്നുവെന്നാണ് വാട്സാപ്പ് അധികൃതർ വ്യക്തമാക്കുന്നത്.
ഓൺലൈനിൽ നിങ്ങളുടെ സ്വകാര്യത കൂടുതൽ പരിരക്ഷിക്കുകയാണ് ലക്ഷ്യമെന്ന് വാട്സാപ്പ് ചൂണ്ടിക്കാട്ടുന്നു. നേരത്തെ വാട്സാപ്പ് മെസേജുകൾക്ക് റിയാക്ട് ചെയ്യാനുള്ള ഓപ്ഷൻ നിലവിൽ വന്നിരുന്നു. ഇത് ഏറെ ജനപ്രിയമാകുകയും ചെയ്തു. കൂടാതെ ഗ്രൂപ്പ് കോളിൽ ഇനി 32 പേരെ വരെ ഉൾപ്പെടുത്താമെന്നാണ് വാട്സാപ്പ് പറയുന്നത്.
