ന്യൂഡൽഹി: അഗ്നിപഥ് പദ്ധതി പ്രകാരം അപേക്ഷിക്കേണ്ടതിന്റെ മാനദണ്ഡങ്ങൾ പുറത്തിറക്കി ഇന്ത്യൻ വ്യോമസേന. പ്രായപരിധി, വിദ്യാഭ്യാസ യോഗ്യതകൾ, സേവന കാലയളവ്, സേവനം പൂർത്തിയാക്കിയതിന് ശേഷമുള്ള അഗ്നിവീരന്മാരുടെ തൊഴിൽ ഓപ്ഷനുകൾ, പരിശീലനം, ശമ്പളം, അലവൻസ്, അനുബന്ധ ആനുകൂല്യങ്ങൾ എന്നിവയെല്ലാമാണ് വ്യോമസേന പുറത്തിറക്കിയ പ്രസ്താവനയിൽ വിശദീകരിച്ചിരിക്കുന്നത്.
The Indian Air Force releases details on 'Agnipath' recruitment scheme
1/2 pic.twitter.com/YKFtJZ2OzP
— ANI (@ANI) June 19, 2022
പദ്ധതിപ്രകാരം ഉൾപ്പെടുത്തുന്ന ഉദ്യോഗാർത്ഥികൾ അഗ്‌നിവീർ എന്നറിയപ്പെടും. ഒരിക്കൽ ഇന്ത്യൻ വ്യോമസേനയിൽ എൻറോൾ ചെയ്തു കഴിഞ്ഞാൽ 1950-ലെ വ്യോമസേന നിയമപ്രകാരം നാല് വർഷത്തേക്ക് അഗ്‌നിവീരന്മാർ നിയന്ത്രിക്കപ്പെടും.
നിലവിലുള്ള മറ്റ് റാങ്കുകളിൽ നിന്നും വ്യത്യസ്തമായി വ്യോമസേനയിലെ അഗ്നിവീറിന് പ്രത്യേക റാങ്ക് രൂപീകരിക്കും. എൻറോൾമെന്റ് പ്രക്രിയയുടെ ഭാഗമായി ഓരോ ‘അഗ്‌നിവീറും’ അഗ്നിപഥ് പദ്ധതിയുടെ എല്ലാ നിബന്ധനകളും വ്യവസ്ഥകളും ഔദ്യോഗികമായി അംഗീകരിക്കേണ്ടതുണ്ടെന്നും വ്യോമസേന വ്യക്തമാക്കി.
17.5നും 21നും ഇടയിൽ പ്രായമുള്ളവർക്കാണ് വ്യോമസേനയിലേക്ക് പ്രവേശനം. വിദ്യാഭ്യാസ യോഗ്യതകളും ശാരീരിക ക്ഷമതകളും സംബന്ധിച്ച വിശദാംശങ്ങൾ പിന്നീട് അറിയിക്കും. 30,000 രൂപ പ്രതിമാസ ശമ്പളവും മറ്റ് അലവൻസുകളും ആനുകൂല്യങ്ങളും കൃത്യമായ ആനുവൽ ഇൻക്രിമന്റും ഉണ്ടാകും.
ഹ്രസ്വകാലയളവിലേക്ക് യുവാക്കളെ സൈന്യത്തിലേക്ക് നിയമിക്കുന്ന പദ്ധതിയാണ് അഗ്നിപഥ്. കഴിഞ്ഞദിവസമാണ് പ്രതിരോധമന്ത്രി രാജ്‌നാഥ് സിംഗ് നിർണായകമായ പദ്ധതിയുടെ പ്രഖ്യാപനം നടത്തിയത്. പദ്ധതിപ്രകാരം നാല് വർഷത്തിന് ശേഷം പുറത്തിറങ്ങുന്ന അഗ്നിവീരന്മാർക്ക് പ്രതിരോധമന്ത്രാലയം ഉൾപ്പെടെ നിരവധി തൊഴിൽ മേഖലകളിൽ സംവരണവും മുൻതൂക്കവും ലഭിക്കും.
