ബേസില്‍ ജോസഫും ദര്‍ശനാ രാജേന്ദ്രനും ഒന്നിക്കുന്ന ജയ ജയ ജയ ജയഹേ സിനിമയുടെ സെറ്റിലായിരുന്നു സഞ്ജുവിന്റെ അപ്രതീക്ഷിത സന്ദര്‍ശനം. പ്രിയ സുഹൃത്ത് ബേസിലിനെ കാണുകയായിരുന്നു സന്ദര്‍ശനത്തിന്റെ ഉദ്ദേശം. സിനിമാ സെറ്റിലെ അപ്രതീക്ഷിത സെലിബ്രറ്റിയെ കണ്ടതോടെ ചിത്രത്തിന്റെ അണിയറ പ്രവര്‍ത്തകതരും ഫോമിലായി. ജയ ജയ ജയ ജയഹേ സിനിമയുടെ സംവിധായകന്‍ വിപിന്‍ ദാസാണ് ഇന്ത്യന്‍ ക്രിക്കറ്റിലെ പുത്തന്‍ താരോദയമായ സഞ്ജു സാംസണ്‍ന്റെ സന്ദര്‍ശത്തിന്റെ ചിത്രങ്ങള്‍ പുറത്ത് വിട്ടത്. മുത്തുഗൗ, അന്താക്ഷരി എന്നീ ചിത്രങ്ങള്‍ക്ക് ശേഷം വിപിന്‍ ദാസ് സംവിധാനം ചെയ്യുന്ന ചിത്രമാണ് ജയ ജയ ജയ ജയഹേ.
ഐപിഎല്ലിലെ മികച്ച പ്രകടനത്തോടെ ഇന്ത്യന്‍ ടീമിലേക്ക് തിരികയെത്തിയ സഞ്ജുവിനെ ആശംസകള്‍ അറിയിച്ചാണ് ബേസിലും സംഘവും യാത്രയാക്കിയത്. അയര്‍ലാന്‍ഡിന് എതിരെയുള്ള 20-20 പരമ്പരയുടെ ട്രെയിനിങ് സെഷനുകള്‍ക്ക് പോകുന്നതിനു മുന്‍പാണ് സുഹൃത്തായ ബേസിലിനെ കാണാന്‍ സഞ്ജു എത്തിയത്. നേരത്തെ ഐപിഎലില്‍, സഞ്ജു ക്യാപ്റ്റനായ രാജസ്ഥാന്‍ റോയല്‍സിന്റെ മത്സരം കാണാന്‍ ബേസിലും ഭാര്യയും മുംബൈയിലെത്തിയിരുന്നു. സഞ്ജുവുമൊത്തുള്ള ബേസിലിന്റെയും അണിയറ പ്രവര്‍ത്തകരുടെയും ചിത്രങ്ങള്‍ സമൂഹ മാധ്യമങ്ങളിലും വൈറലാണ്.
