താൻ പറഞ്ഞ വാക്കിൽ നിന്ന് പിന്മാറാൻ തയ്യാറല്ലെന്ന് തെളിയിച്ച് നടൻ സുരേഷ്ഗോപി. മിമിക്രി കലാകാരൻമാരുടെ സംഘടനയായ മായ്ക്ക് വീണ്ടും രണ്ട് ലക്ഷം നൽകി നടൻ. താൻ അഭിനയിക്കുന്ന എല്ലാ സിനിമയിൽ നിന്നും രണ്ട് ലക്ഷം രൂപ മിമിക്രികാരുടെ സംഘടനയായ മായ്ക്ക് കൈമാറുമെന്ന് 2021ലാണ് സുരേഷ് ഗോപി വാക്ക് നൽകുന്നത്. ആ വാക്ക് പാലിക്കാനുള്ളതാണെന്ന് നടൻ വീണ്ടും തെളിയിച്ചിരിക്കുകയാണ്. ലിസ്റ്റിൻ സ്റ്റീഫനും മാജിക് ഫ്രെയിമുകളുമൊത്തുള്ള തന്റെ വരാനിരിക്കുന്ന ചിത്രത്തിന് ലഭിച്ച അഡ്വാൻസ് തുകയിൽ നിന്നുമാണ് താരം രണ്ട് ലക്ഷം രൂപയുടെ ചെക്ക് മിമിക്രി ആർട്ടിസ്റ്റ് അസോസിയേഷന് നൽകിയിരിക്കുന്നത്. നടനും സംവിധായകനുമായ നാദിർഷയ്ക്കാണ് മിമിക്രി ആർട്ടിസ്റ്റ് അസോസിയേഷന് വേണ്ടിയുള്ള തുക സുരേഷ് ഗോപി നൽകിയത്.
മായ്ക്ക് സുരേഷ് ഗോപി പണം നൽകുന്നത് ഇത് മൂന്നാം തവണയാണ്. ഒറ്റക്കൊമ്പൻ എന്ന ചിത്രത്തിന് അഡ്വാൻസ് ലഭിച്ചപ്പോഴും അതിന് മുൻപും നടൻ മിമിക്രി ആർട്ടിസ്റ്റ് അസോസിയേഷന് തുക കൈമാറിയിരുന്നു. മിമിക്രി താരങ്ങൾക്കൊപ്പമുള്ള മാ മാമാങ്കം എന്ന പരിപാടിയിൽ പങ്കെടുത്തുകൊണ്ടാണ് സുരേഷ് ഗോപി ഈ വാഗ്ദാനം നൽകിയത്. കൊറോണ കാലത്ത് ഏറെ പ്രതിസന്ധിയിലായവരാണ് മിമിക്രി കലാകാരൻമാർ. മിമിക്രി കലാകാരൻമാർക്ക് സഹായം എത്തിക്കാനായി സംഘടിപ്പിച്ച പരിപാടിയിലാണ് സുരേഷ് ഗോപി പ്രതിഫലത്തുകയിൽ നിന്നും രണ്ടു ലക്ഷം നൽകുമെന്ന് പ്രഖ്യാപിച്ചത്. അതിന് മുടക്കം വരാതെ കൃത്യമായി താരം സംഘടനയ്ക്ക് പണം നൽകുന്നു.
വാർദ്ധക്യത്തിലാണ് നല്ല കാലം വരുന്നത്. എനിക്കും അങ്ങനെയാണ്. സമ്പാദിച്ച് കൊണ്ടിരിക്കുന്ന കാശിൽ നിന്നും ഇത്ര തരാമെന്ന് പറയുന്നതിൽ ഒരു കുറച്ചിലുണ്ട്. പക്ഷേ ഞാൻ വാക്ക് തരുന്നു, ഇവിടുന്ന് അങ്ങോട്ട് ചെയ്യുന്ന ഓരോ സിനിമയിൽ നിന്നും രണ്ടു ലക്ഷം രൂപ, ദാനമല്ല വിഹിതമായി നൽകി കൊള്ളാം എന്നായിരുന്നു സുരേഷ് ഗോപി പറഞ്ഞത്.
Comments