കാസർകോട് : കാസർകോട് മൊബൈൽ ടവറിന് മുകളിൽ കയറി നിന്ന് യുവാവിന്റെ ആത്മഹത്യാ ഭീഷണി. പാലക്കുന്ന് സ്വദേശി ഷൈജുവാണ് ആത്മഹത്യാ ഭീഷണി മുഴക്കുന്നത്. തന്റെ പേരിലുള്ള കേസ് ഒഴിവാക്കണമെന്നാണ് ആവശ്യം.
മുഖ്യമന്ത്രിയ്ക്ക് എന്ന പേരിൽ ഒരു വീഡിയോയും ഇയാൾ ഷൂട്ട് ചെയ്ത് അയച്ചിട്ടുണ്ട്. ” ബഹുമാനപ്പെട്ട കേരള മുഖ്യമന്ത്രി പിണറായി വിജയൻ സാർ, കാസർകോട് പോലീസ് എന്നെയും കുടുംബത്തെയും വേട്ടയാടുന്നു. ജീവിക്കാൻ അനുവദിക്കുന്നില്ല. കളളക്കേസിൽ കുടുക്കി എന്നെ ജീവിക്കാൻ വിടുന്നില്ല. ഞാൻ ആത്മഹത്യ ചെയ്യുകയാണ്” എന്നാണ് ഷൈജു വീഡിയോയിൽ പറയുന്നത്.
കഴുത്തിൽ കയർ കുരുക്കിയാണ് ഷൈജു നിൽക്കുന്നത്. അതേസമയം അടിപിടി, മയക്കുമരുന്ന് ഉൾപ്പെടെ ഷൈജുവിന്റെ പേരിൽ പത്തിലധികം കേസുകളുണ്ടെന്നാണ് പോലീസ് പറയുന്നത്.
വിവരമറിഞ്ഞ് നാട്ടുകാരാണ് ആദ്യം തടിച്ചുകൂടിയത്. തുടർന്ന് പോലീസും ഫയർ ഫോഴ്സും സ്ഥലത്തെത്തി. ഷൈജുവിനെ അനുനയിപ്പിച്ച് താഴെയിറക്കാനുള്ള ശ്രമത്തിലാണ് എല്ലാവരും.
