ന്യൂഡല്ഹി: കേന്ദ്രത്തിന്റെ സൈനിക റിക്രൂട്ട്മെന്റ് പദ്ധതിയായ അഗ്നിപഥിന്റെ പേരില് നടക്കുന്ന പ്രതിഷേധങ്ങളില് പ്രതികരിച്ച് ദേശീയ സുരക്ഷ ഉപദേഷ്ടാവ്(എന്എസ്എ) അജിത് ഡോവല്. ജനാധിപത്യരാജ്യത്ത് സമാധാനപരമായ പ്രതിഷേധങ്ങള് അനുവദനീയമാണ്.എന്നാല് നാശം വിതയ്ക്കാന് അനുവദിക്കില്ലെന്ന് അദ്ദേഹം വ്യക്തമാക്കി.
രണ്ട് തരത്തിലുള്ള പ്രതിഷേധക്കാരാണ് ഇപ്പോഴുള്ളത്. ഒരു കൂട്ടര് രാജ്യത്തെ സ്നേഹിക്കുകയും സേവനം ചെയ്തവരും ആണ്. പക്ഷെ അവര്ക്ക് ആശങ്കയുണ്ട്, അറിവില്ലായ്മ കൊണ്ടുളള ഭയവും. എന്തെങ്കിലും ഒരു മാറ്റം സംഭവിച്ചാല് എന്താകുമെന്ന ആശങ്കയും ഉത്ക്കണ്ഠയുമാണ് അവര്ക്ക്. വിരമിച്ച ചിലരും അഗ്നിപഥില് ആശങ്ക പങ്കുവെച്ചിരുന്നു. അവരെയൊക്കെ നമുക്ക് മനസിലാക്കാന് സാധിക്കും. എന്നാല് രണ്ടാമത്തെ വിഭാഗം ദേശസുരക്ഷയില് യാതൊരു ആശങ്കയും ഇല്ലാത്തവരാണ്. ആഭ്യന്തരകലഹം സൃഷ്ടിക്കാനാണ് ഇക്കൂട്ടര്ക്ക് താല്പര്യം.
ട്രെയിനുകള് കത്തിച്ചും കല്ലെറിഞ്ഞും സര്ക്കാരിനെ അപകീര്ത്തിപ്പെടുത്താനുള്ള ശ്രമമാണ് നടക്കുന്നതെന്നും അദ്ദേഹം പറഞ്ഞു. അഗ്നിപഥിന്റെ പേരില് പ്രതിഷേധം നടത്താന് സ്ഥാപിത താല്പര്യം ഉണ്ടെന്നും പറഞ്ഞു. കോച്ചിങ്ങ് സെന്ററുകള് വഴി വരുമാനം ഉണ്ടാക്കുന്നവരുണ്ടാകും പക്ഷേ ജനാധിപത്യരാജ്യത്ത് നാശം വിതയ്ക്കാന് അനുവദിക്കില്ലെന്ന് അദ്ദേഹം പറഞ്ഞു.
17 മുതല് 26 വയസുവരെ പ്രായമുള്ള യുവാക്കള്ക്ക് ഹ്രസ്വകാലത്തേക്ക് സൈനിക സേവനം അനുഷ്ഠിക്കാന് അവസരം ഒരുക്കുന്ന കേന്ദ്രസര്ക്കാര് പദ്ധതിയാണ് അഗ്നിപഥ്. ഇതുവഴി കര, വ്യോമ, നാവിക സേനകളില് യുവാക്കള്ക്ക് നാല് വര്ഷക്കാലം ജോലി ചെയ്യാം. നിയമനം ലഭിക്കുന്ന 25 ശതമാനം യുവാക്കള്ക്ക് സൈന്യത്തിലേക്ക് സ്ഥിരനിയമനവും ലഭിക്കുന്നതാണ്.
Comments