ഗാങ്ടോക്: സിക്കിമിലെ നാംചി ജില്ലയില് നിര്മാണത്തിലിരുന്ന ടണലില് മീഥേന് വാതക സ്ഫോടനത്തെ തുടര്ന്ന് ഉണ്ടായ മണ്ണിടിച്ചിലില് ഏഴ് തൊഴിലാളികള് മരിക്കുകയും 27-ലധികം തൊഴിലാളികള് കുടുങ്ങുകയും ചെയ്തു. അപകടത്തില്പ്പെട്ടവരെ പുറത്തെടുക്കാന് ദേശീയ ദുരന്തനിവാരണ സേന (NDRF), സംസ്ഥാന ദുരന്തനിവാരണ സേന (SDRF), പൊലീസ്, അഗ്നിരക്ഷാസേന എന്നിവയുടെ നേതൃത്വത്തില് രക്ഷാപ്രവര്ത്തനം തുടരുകയാണ്.
എന്എച്ച്പിസിയുടെ (NHPC) തീസ്ത സ്റ്റേജ്-6 ജലവൈദ്യുത പദ്ധതിയുടെ ഭാഗമായി പട്ടേല് എന്ജിനീയറിങ് നിര്മിച്ചുകൊണ്ടിരിക്കുന്ന അഡിറ്റ് (ADIT) ടണലിലാണ് അപകടമുണ്ടായത്. ടണലിനുള്ളില് ഏകദേശം 1.5 കിലോമീറ്റര് അകലെയായി മീഥേന് വാതകം അടിഞ്ഞുകൂടിയിരുന്നു. ഇത് പുറത്തുവിടാനുള്ള ശ്രമത്തിനിടെയാണ് സ്ഫോടനമുണ്ടായതെന്നാണ് പ്രാഥമിക നിഗമനം.
സ്ഫോടനത്തെ തുടര്ന്ന് ടണലിന്റെ പ്രവേശനഭാഗത്ത് മണ്ണിടിച്ചിലുണ്ടാകുകയും നിരവധി തൊഴിലാളികള് അകപ്പെടുകയും ചെയ്തു. ചിലര് ഉടന് പുറത്തുകടക്കാന് കഴിഞ്ഞെങ്കിലും മറ്റുള്ളവര് ടണലിനുള്ളില് കുടുങ്ങുകയായിരുന്നു.
രക്ഷാപ്രവര്ത്തനത്തിന് വലിയ വെല്ലുവിളിയാണ് ടണലിനുള്ളിലെ മീഥേന് വാതക സാന്നിധ്യം, ഓക്സിജന് ക്ഷാമം, കാഴ്ചക്കുറവ്, ഇടുങ്ങിയ പാത എന്നിവ. ആദ്യഘട്ട രക്ഷാപ്രവര്ത്തനത്തിനിറങ്ങിയ അഗ്നിരക്ഷാസേനാംഗങ്ങള് ശ്വാസതടസം അനുഭവപ്പെട്ടതിനെ തുടര്ന്ന് മടങ്ങേണ്ടിവന്നു. തുടര്ന്ന് എന്ഡിആര്എഫിന്റെ ശ്രമവും പ്രതികൂല സാഹചര്യങ്ങള് കാരണം വിജയിച്ചില്ല.
ഇതോടെ പ്രത്യേക ഗ്യാസ്-പ്രൊട്ടക്ഷന് ഉപകരണങ്ങളുമായി പശ്ചിമ ബംഗാളില് നിന്ന് വിദഗ്ധ സംഘത്തെ എത്തിച്ചിട്ടുണ്ട്. ആംബുലന്സുകള് അപകടസ്ഥലത്ത് സജ്ജമാക്കിയിരിക്കുകയാണ്. ജില്ലാഭരണകൂടവും മുതിര്ന്ന ഉദ്യോഗസ്ഥരും സ്ഥലത്ത് ക്യാമ്പ് ചെയ്ത് രക്ഷാപ്രവര്ത്തനങ്ങള് ഏകോപിപ്പിച്ചുവരികയാണ്.
ഭൂഗര്ഭ ശിലാപാളികളിലെ മാറ്റങ്ങളെത്തുടര്ന്നാകാം മീഥേന് വാതകം സ്വാഭാവികമായി അടിഞ്ഞുകൂടിയതെന്നാണ് അധികൃതരുടെ പ്രാഥമിക വിലയിരുത്തല്. സംഭവത്തിന്റെ യഥാര്ഥ കാരണം കണ്ടെത്താന് അന്വേഷണം ആരംഭിച്ചിട്ടുണ്ട്.
