ദിസ്പൂര്: അസമില് വെള്ളപ്പൊക്കം അതിരൂക്ഷം. ബരാക്ക് വാലിയിലും കരിംഗഞ്ച് ജില്ലയിലും സ്ഥിതി രൂക്ഷം. കഴിഞ്ഞ 24 മണിക്കൂറിനിടയില് 11 പേര് മരിച്ചു,8 പേരെ കാണാതെയായി. ഇതു വരെ മണ്ണിടിച്ചിലിലും വെള്ളപ്പൊക്കത്തിലുമായി നൂറോളം പേര് മരണപ്പെട്ടെന്നാണ് കണക്കുകള്.
രക്ഷാപ്രവര്ത്തനത്തിന് ഭുവനേശ്വറില് നിന്നും ദേശീയ ദുരന്ത നിവാരണ സേന(എന്ഡിആര്എഫ്)സംഘത്തെ വിന്യസിച്ചുണ്ടെന്ന് സര്ക്കാര് അറിയിച്ചു. ബരാക് വാലിയിലെ രക്ഷപ്രവര്ത്തനത്തിന് 105 പേരാകും എത്തുകയെന്ന് മുഖ്യമന്ത്രി ഹിമാന്ത ബിശ്വ ശര്മ അറിയിച്ചു. ദ്രുതഗതിയില് സഹായം നല്കിയതിന് കേന്ദ്ര ആഭ്യന്തര മന്ത്രി അമിത് ഷായ്ക്ക് അദ്ദേഹം നന്ദി അറിയിക്കുകയും ചെയ്തു.
സംസ്ഥാന ദുരന്ത നിവാരണ അതോറിറ്റിയുടെ (എഎസ്ഡിഎംഎ) റിപ്പോര്ട്ടുകള് പ്രകാരം ബാര്പേട്ട ജില്ലയില് 12,30,721 പേരും ഡരാങ്ങ് ജില്ലയില് 4,69,241 പേരും ബജാലി ജില്ലയില് 3,38,515 പേരും വെള്ളപ്പൊക്കത്തില് അകപ്പെട്ടിട്ടുണ്ട്.മിക്ക ജില്ലകളിലും വീടുകളില് വെള്ളം കയറിയ നിലയിലാണ്. കനത്ത മഴയാണ് ഇപ്പോഴുള്ള സാഹചര്യത്തിന് കാരണം. 5,424 ഗ്രാമങ്ങളിലാണ് മഴ ബാധിച്ചത്. കഴിഞ്ഞ 24 മണിക്കൂറിനിടയില് 11,292 പേരെയും 27,086 വളര്ത്തുമൃഗങ്ങളെയും ഒഴിപ്പിച്ചു. 48 ലക്ഷം പേരെ ബാധിക്കുകയും ചെയ്തു.615 ക്യാമ്പുകള് വഴി നിരവധി ആുകള്ക്ക് സഹായം എത്തിച്ചു.
Comments