തിരുവനന്തപുരം: പോലീസ് വാഹനങ്ങളിലെ മത ചിഹ്നങ്ങൾ ഒഴിവാക്കണമെന്ന് ഉദ്യോഗസ്ഥർക്ക് നിർദ്ദേശം നൽകി സംസ്ഥാന പോലീസ് മേധാവി. പമ്പയിൽ എത്തിയ പോലീസ് വാഹനത്തിൽ ഇസ്ലാം മത ചിഹ്നം പതിപ്പിച്ചത് വൻ വിവാദമായ സാഹചര്യത്തിലാണ് നടപടി. സ്റ്റിക്കർ പതിപ്പിച്ചവർക്കെതിരെ നടപടി സ്വീകരിക്കാനും സംസ്ഥാന പോലീസ് മേധാവി നിർദ്ദേശം നൽകിയിട്ടുണ്ട്.
ഇന്ന് തന്നെ പോലീസ് വാഹനത്തിലെ ഇത്തരം സ്റ്റിക്കറുകൾ ഒഴിവാക്കണമെന്നാണ് നിർദ്ദേശം. പോലീസ് വാഹനങ്ങളിൽ വ്യക്തി, മത, രാഷ്‌ട്രീയ, സാമുദായിക പരമായ എഴുത്തുകളോ അടയാളങ്ങളോ പതിപ്പിക്കാൻ പാടില്ലാത്തതാണ്. എന്നാൽ ഇതിന് വിരുദ്ധമായി ഇസ്ലാമിക മത ചിഹ്നം പതിപ്പിച്ചത് സേനയ്‌ക്ക് കളങ്കം ഉണ്ടാക്കി. അതുകൊണ്ട് ഏതെങ്കിലും വാഹനത്തിൽ ഇത്തരം സ്റ്റിക്കറുകൾ പതിപ്പിച്ചിട്ടുണ്ടെങ്കിൽ ഉടനെ നീക്കം ചെയ്യണം. ഇതിന്റെ റിപ്പോർട്ട് നാളെ വൈകീട്ട് അഞ്ച് മണിയ്‌ക്ക് മുൻപായി അയക്കണമെന്നും നിർദ്ദേശമുണ്ട്.
ഇത്തരം സംഭവങ്ങൾ ആവർത്തിക്കാതിരിക്കാൻ ശ്രദ്ധിക്കണം. ഇക്കാര്യം യൂണിറ്റ് മേധാവിമാർ ശ്രദ്ധിക്കണം. ഇത്തരം സംഭവങ്ങൾ ആവർത്തിച്ചാൽ വാഹനത്തിന്റെ ചുമതല വഹിക്കുന്ന ഡ്രൈവറും അനുവദിക്കപ്പെട്ടിട്ടുള്ള ഉദ്യോഗസ്ഥനും തുല്യ ഉത്തരവാദിത്വമുണ്ടായിരിക്കുമെന്നും മുന്നറിയിപ്പുണ്ട്.
കഴിഞ്ഞ ദിവസമാണ് ചന്ദ്രക്കലയും നക്ഷത്രവും പതിപ്പിച്ച പോലീസ് വാഹനം പമ്പയിൽ എത്തിയത്. ജനം ടിവിയാണ് ഇതിന്റെ വാർത്ത പുറത്തുവിട്ടത്.
