ഡല്ഹി: രാജ്യത്ത് ഭക്ഷ്യ എണ്ണകളുടെ വിലയില് കാര്യമായ കുറവാണ് സംഭവിക്കുന്നത്. പ്രധാന ബ്രാന്ഡുകളുടെ ഭക്ഷ്യ എണ്ണ വില ലിറ്ററിന് 10 മുതല് 15 രൂപ വരെയാണ് കുറച്ചത്. വിലക്കയറ്റം തടയാന് ഈ മേഖലയില് കേന്ദ്ര സര്ക്കാര് നടത്തിയ ഇടപെടലിന്റെ അടിസ്ഥാനത്തിലാണ് എണ്ണ വില കുറഞ്ഞത്.
സൂര്യകാന്തി എണ്ണ, സോയാബീന് എണ്ണ, പാമോയില് വനസ്പതി എന്നിവയുടെ വില കഴിഞ്ഞ മൂന്ന് ദിവസമായി കുറഞ്ഞുവരികയാണ്. ഭക്ഷ്യ എണ്ണകളുടെ വില കുറയുന്നത് മൊത്തത്തിലുള്ള വിലക്കയറ്റത്തില് ഗുണകരമായ മാറ്റം വരുത്തുമെന്നും വരും ദിവസങ്ങളില് വില ഇനിയും കുറയുമെന്നും ഭക്ഷ്യ പൊതുവിതരണ വകുപ്പ് സെക്രട്ടറി സുതാന്ഷു പാണ്ഡെ പറഞ്ഞു.
വില കുറയാനുള്ള കാരണം
അസംസ്കൃത പാമോയില്, സോയാബീന്, സൂര്യകാന്തി എണ്ണകള്ക്ക് ഏര്പ്പെടുത്തിയിരുന്ന അടിസ്ഥാന നികുതിയായ 2.5 ശതമാനം കേന്ദ്ര സര്ക്കാര് പൂര്ണമായി ഒഴിവാക്കി.
ഈ എണ്ണകളുടെ കാര്ഷിക സെസ് 5 ശതമാനമായി കുറയ്ക്കുകയും ചെയ്തു.
പാചക എണ്ണകളുടെ വില കുറയ്ക്കാനായി അസംസ്കൃത സോയാബീന്, സൂര്യ കാന്തി എണ്ണകളുടെ ഇറക്കുമതിക്ക് താരിഫ് റേറ്റ് കോട്ട അനുവദിച്ച് കേന്ദ്ര സര്ക്കാര് വിഞ്ജാപനം ഇറക്കി
ഇതുപ്രകാരം 2022-23, 2023-24 സാമ്പത്തിക വര്ഷങ്ങളില് 20 ലക്ഷം മെട്രിക് ടണ് വീതം ഇറക്കുമതി ചെയ്യുന്നതിന് ചുങ്കം ഏര്പ്പെടുത്തില്ല.
സംസ്കരിച്ച സോയാബീന് എണ്ണയുടേയും സൂര്യ കാന്തി എണ്ണയുടേയും അടിസ്ഥാന നികുതി 32.5 ശതമാനത്തില് നിന്ന് 17.5 ശതമാനമായി കുറച്ചു.
സംസ്കരിച്ച പാമോയിലിന്റെ അടിസ്ഥാന നികുതി 17.5 ശതമാനത്തില് നിന്ന് 12.5 ശതമാനമായി കുറച്ചു.
മിന്നല് പരിശോധനകള് ഗുണം ചെയ്തു
മിന്നല് പരിശോധനകള് കര്ശനമാക്കിയതോടെ പൂഴ്ത്തി വയ്പ്പ് ഒരു പരിധിവരെ തടയാന് സാധിച്ചു. ഗുജറാത്ത്, മഹാരാഷ്ട്ര, മധ്യപ്രദേശ്, രാജസ്ഥാന്, ഉത്തര്പ്രദേശ്, പശ്ചിമ ബംഗാള്, തെലങ്കാന, കര്ണാടക തുടങ്ങിയ സംസ്ഥാനങ്ങളിലെ വിവിധ വ്യാപാര കേന്ദ്രങ്ങളില് പരിശോധന നടന്നു
ആദ്യ ഘട്ടത്തിലെ പരിശോധനയില് 53 വ്യാപാരസ്ഥാപനങ്ങളാണ് പൂഴ്ത്തി വയ്ക്കുന്നതായി കണ്ടെത്തിയതെങ്കില് രണ്ടാം ഘട്ടത്തില് ഇത് 12ആയി കുറഞ്ഞെന്ന് അധികൃതര് അറിയിച്ചു. പൂഴ്ത്തി വയ്ക്കുന്ന വ്യാപാര സ്ഥാപനങ്ങള്ക്കെതിരെ അവശ്യ വസ്തു നിയമ പ്രകാരം കര്ശന നടപടിക്ക് സംസ്ഥാന സര്ക്കാരുകള്ക്ക് നിര്ദ്ദേശം നല്കി.
Comments