ഓക്ലന്‍ഡ്: നാല് പതിറ്റാണ്ടിന് ശേഷം ഒരു ഇന്ത്യന്‍ പ്രധാനമന്ത്രി നടത്തുന്ന ചരിത്ര സന്ദര്‍ശനത്തിന് തുടക്കം കുറിച്ച് പ്രധാനമന്ത്രി നരേന്ദ്ര മോദി ന്യൂസിലന്‍ഡിലെത്തി. ഓക്ലന്‍ഡ് വിമാനത്താവളത്തില്‍ ന്യൂസിലന്‍ഡ് പ്രധാനമന്ത്രി ക്രിസ്റ്റഫര്‍ ലക്സണ്‍ നേരിട്ടെത്തിയാണ് മോദിയെ സ്വീകരിച്ചത്. ഇന്ത്യന്‍ സമൂഹത്തിന്റെ വന്‍ പങ്കാളിത്തവും ആവേശകരമായ വരവേല്‍പ്പുമാണ് പ്രധാനമന്ത്രിക്ക് ലഭിച്ചത്.
ഇന്ത്യന്‍ ദേശീയപതാകകള്‍ വീശിയും ‘കിയ ഓറ മോദി’ എന്ന മുദ്രാവാക്യം മുഴക്കിയും പ്രവാസി ഇന്ത്യക്കാര്‍ പ്രധാനമന്ത്രിയെ വരവേറ്റു. പരമ്പരാഗത കലാപരിപാടികളിലൂടെ ഇന്ത്യയുടെ വൈവിധ്യമാര്‍ന്ന സാംസ്‌കാരിക പാരമ്പര്യവും ന്യൂസിലന്‍ഡിലെ ഇന്ത്യന്‍ സമൂഹം അവതരിപ്പിച്ചു.
പഞ്ചാബിന്റെയും തമിഴ്‌നാട്ടിന്റെയും നാടന്‍ കലാരൂപങ്ങള്‍, കര്‍ണാടക-ഹിന്ദുസ്ഥാനി ശാസ്ത്രീയ സംഗീതത്തിന്റെ മനോഹരമായ സംഗമം, ‘വന്ദേ മാതരം’ ആലാപനം എന്നിവ ചടങ്ങിന് മാറ്റുകൂട്ടി. തലമുറകള്‍ക്കും ഭൂഖണ്ഡങ്ങള്‍ക്കും അപ്പുറം ഇന്ത്യന്‍ സംസ്‌കാരം ജീവസുറ്റതാക്കി നിലനിര്‍ത്തുന്ന പ്രവാസി ഇന്ത്യക്കാരെ പ്രധാനമന്ത്രി അഭിനന്ദിച്ചു.
‘നാദ് വോക്കല്‍ എന്‍സെംബിള്‍’ അവതരിപ്പിച്ച സംഗീതപരിപാടിയെ പ്രത്യേകം പ്രശംസിച്ച മോദി, സംഗീതത്തിന് ജനങ്ങളെ ഒരുമിപ്പിക്കാനുള്ള അസാധാരണ ശക്തിയുണ്ടെന്നും ഇന്ത്യ-ന്യൂസിലന്‍ഡ് സൗഹൃദത്തിന്റെ ഊഷ്മളത ആ അവതരണം മനോഹരമായി പ്രതിഫലിപ്പിച്ചെന്നും സാമൂഹിക മാധ്യമങ്ങളിലൂടെ കുറിച്ചു.
രണ്ടുദിവസത്തെ സന്ദര്‍ശനത്തിനിടെ പ്രധാനമന്ത്രി നരേന്ദ്ര മോദിയും ന്യൂസിലന്‍ഡ് പ്രധാനമന്ത്രി ക്രിസ്റ്റഫര്‍ ലക്സണും ഉഭയകക്ഷി ചര്‍ച്ചകള്‍ നടത്തും. വ്യാപാരം, നിക്ഷേപം, വിദ്യാഭ്യാസം, സാങ്കേതികവിദ്യ, ജനങ്ങള്‍ തമ്മിലുള്ള ബന്ധം തുടങ്ങിയ മേഖലകളിലെ സഹകരണം കൂടുതല്‍ ശക്തിപ്പെടുത്തുന്നതാകും ചര്‍ച്ചകളിലെ പ്രധാന വിഷയങ്ങള്‍. ഇന്ത്യ-ന്യൂസിലന്‍ഡ് ബന്ധത്തില്‍ പുതിയ അധ്യായം തുറക്കുന്ന സന്ദര്‍ശനമായാണ് ഇത് വിലയിരുത്തപ്പെടുന്നത്.
