ഇന്ത്യൻ ഫുട്ബോളിന്റെ നെറുകയിലെ മലയാളിക്കരുത്തിന് ലോകത്തിന്റെ ആദരം. മലയാളികളുടെ സ്വന്തം ഐ എം വിജയനെ റഷ്യൻ സർവ്വകലാശാല ഡോക്ടറേറ്റ് നൽകി ആദരിച്ചു.റഷ്യയിലെ അക്കാൻഗിർസ്ക് നോർത്തേൺ സ്റ്റേറ്റ് മെഡിക്കൽ സർവ്വകലാശാലയാണ്, ഇന്ത്യൻ ഫുട്ബോളിന് നൽകിയ മികച്ച സംഭാവനകൾ പരിഗണിച്ച് ഐ എം വിജയന് ഡോക്ടറേറ്റ് നൽകിയത്.
ജൂൺ 10നാണ് ഐ എം വിജയന് സർവ്വകലാശാല ഡോക്ടറേറ്റ് നൽകിയത്. ഡോക്ടറേറ്റ് ലഭിച്ച വിവരം ഐ എം വിജയൻ തന്നെ സാമൂഹിക മാദ്ധ്യമത്തിലൂടെ പുറത്ത് വിട്ടിരുന്നു. 1999ലെ സാഫ് ഗെയിംസിൽ പന്ത്രണ്ടാം സെക്കൻഡിൽ നേടിയ ഗോളാണ്, സർവ്വകലാശാല അധികൃതർക്ക് ഏറ്റവും കൂടുതൽ ഇഷ്ടമായതെന്ന് ഐ എം വിജയൻ പറഞ്ഞു. ഈ ഗോളാണ്, ഏറ്റവും വേഗത്തിൽ ഗോൾ നേടുന്നയാൾ എന്ന അന്താരാഷ്‌ട്ര റെക്കോർഡ് ഐ എം വിജയന് സമ്മാനിച്ചത്.
പതിനെട്ടാം വയസ്സിൽ കേരള പോലീസ് ഫുട്ബോൾ ടീമിൽ അംഗമായ ഐ എം വിജയൻ, നാലാം വർഷം മോഹൻ ബഗാനിലെത്തി. ജെസിടി മിൽസ് ഫഗ്വാര, എഫ് സി കൊച്ചിൻ, ഈസ്റ്റ് ബംഗാൾ, ചർച്ചിൽ ബ്രദേഴ്സ് തുടങ്ങിയ ക്ലബ്ബുകളിൽ അദ്ദേഹം ബൂട്ടണിഞ്ഞു. 1992ൽ ഇന്ത്യൻ ദേശീയ ടീമിലെത്തിയ ഐ എം വിജയൻ, ഇന്ത്യക്ക് വേണ്ടി 79 മത്സരങ്ങൾ കളിച്ചു. 39 അന്താരാഷ്‌ട്ര ഗോളുകൾ നേടിയിട്ടുണ്ട്.
