ദിസ്പൂര്: കനത്ത മഴയിലും വെള്ളപ്പൊക്കത്തിലും മരണസംഖ്യ കൂടുന്നു. കഴിഞ്ഞ 24 മണിക്കൂറിനിടെ ഏഴ് മരണം കൂടി റിപ്പോര്ട്ട് ചെയ്തതോടെ മരണസംഖ്യ 107 ആയി ഉയര്ന്നു. ഇന്നലെ മരിച്ചവരില് രണ്ട് പേര് കുട്ടികളാണ്. 17 പേര് മണ്ണിടിച്ചിലില് അകപ്പെട്ട് മരിച്ചവരാണ്.
കാച്ചര്,ബാര്പേട്ട ജില്ലകളില് 2 പേര് വീതവും ധുബ്രി,ബജാലി, താമുല്പൂര് ജില്ലകളില് ഓരോരുത്തരുമാണ് മരിച്ചത്. കൂടുതല് നാശനഷ്ടങ്ങള് വിതച്ചത് ബാര്പേട്ട ജില്ലയിലാണ്. 10.32 ലക്ഷം ആളുകളെ ബാധിച്ചെന്നാണ് പ്രാഥമിക റിപ്പോര്ട്ട്. 30 ജില്ലകളിലായി 45.34 ലക്ഷം പേര് പ്രളയസാഹചര്യത്തില് നിന്ന് മുക്തരായി.
ബ്രഹ്മപുത്ര, ഡിസാങ്, കോപിലി നദികള് ധുബ്രി, ശിവസാഗര്, നാഗോണ് തുടങ്ങിയ ജില്ലകളില് അപകട പരിധിക്ക് മുകളിലാണ് വെള്ളം ഒഴുകുന്നത്. 759 ദുരിതാശ്വാസ ക്യാമ്പുകളിലായി 2.84 ലക്ഷം പേരെയാണ് പാര്പ്പിച്ചിരിക്കുന്നത്. ക്യാമ്പുകളില് പ്രീസ്കൂള് പ്രവര്ത്തനങ്ങള് ഉറപ്പാക്കുന്നുണ്ടെന്ന് സംയോജിത ശിശു വികസന സേവന വകുപ്പ് അറിയിച്ചു.
പ്രധാനമന്ത്രി നരേന്ദ്ര മോദി അസമിലെ സാഹചര്യം നിരന്തരമായി വിലയിരുത്തി സഹായം ഉറപ്പാക്കുന്നുണ്ട്. പ്രളയബാധിത പ്രദേശത്ത് കേന്ദ്ര സേനയെ വിന്യസിച്ചിട്ടുണ്ട്. വ്യോമസേന 250 പേരെ രക്ഷിച്ചതായും ട്വിറ്ററിലൂടെ അറിയിച്ചു.
മുഖ്യമന്ത്രി ഹിമാന്ത ബിശ്വ ശര്മ വ്യോമ മാര്ഗം ചാച്ചര് ജില്ലയിലെ സ്ഥിതിഗതികള് വിലയിരുത്തി. രക്ഷപ്രവര്ത്തനം ഏകോപ്പിക്കുന്നതിനായി ദേശീയ ,സംസ്ഥാന ദുരന്ത നിവാരണ സേനകളിലെ മുതിര്ന്ന ഉദ്യോഗസ്ഥരുമായി ചര്ച്ച സംഘടിപ്പിച്ചു.
സംസ്ഥാന സര്ക്കാര് ഹെല്പ്പ്ലൈന് നമ്പരുകള് ആരംഭിച്ചിട്ടുണ്ട്. 03612237219, 9401044617, 1079( ടോള്ഫ്രീ) എന്നീ നമ്പരുകളിലേക്ക് സഹായത്തിനായി വിളിക്കാവുന്നതാണ്.
