മയൂര്ഭഞ്ജ്: എന്ഡിഎയുടെ രാഷ്ട്രപതി സ്ഥാനാര്ത്ഥി ദ്രൗപതി മുര്മുവിന്റെ പൈതൃകഗ്രാമത്തിലേക്ക് വൈദ്യുതി എത്തും. മുര്മു താമസിച്ചിരുന്ന മയൂര്ഭഞ്ജ് ജില്ലയിലെ ഉപാര്ബേദ ഗ്രാമത്തിലെ വൈദ്യുതി ഇല്ലാതിരുന്ന വീടുകളിലാണ് കറണ്ട് എത്തിക്കാന് ജോലികള് ആരംഭിച്ചത്.
കുസുമി ബ്ലോക്കിലാണ് ഉപര്ബേദ വില്ലേജ്. ബഡാസാഹി, ദുംഗൂര്സാഹി എന്നിങ്ങനെ രണ്ട് ചെറുഗ്രാമങ്ങളാണ് ഇവിടെയുളളത്. ഏകദേശം 3500 ഓളം പേര് ഇവിടെ താമസിക്കുന്നുമുണ്ട്. ഇതില് ബഡാസാഹി പൂര്ണമായി വൈദ്യുതീകരിച്ചിട്ടുണ്ട്. എന്നാല് ദുംഗൂര്സാഹിയില് 14 വീടുകളില് ഇതുവരെ വൈദ്യുതി എത്തിയിട്ടില്ല. ഇവിടെ വെളിച്ചം എത്തിക്കാനുളള ജോലികളാണ് ആരംഭിച്ചിരിക്കുന്നത്.
ദുംഗൂര്സാഹിയിലെ ഇരുപതോളം കുടുംബങ്ങള് താമസിക്കുന്ന വീടുകളില് മാത്രമാണ് വൈദ്യുതി എത്തിക്കാനുളളതെന്ന് അധികൃതര് പറയുന്നു. ഇവരെ ഇരുട്ടില് കിടത്തണമെന്ന് നിര്ബന്ധമുണ്ടായിട്ടല്ല, പക്ഷെ ഇവര് താമസിക്കുന്നത് വനമേഖലയിലാണ്. അതാണ് നടപടികള് വൈകിപ്പിച്ചതെന്നും ഉദ്യോഗസ്ഥര് പറഞ്ഞു.
വൈദ്യുതി ഇല്ലാത്തതിനാല് ഈ വീട്ടുകാര് ഏറെ ബുദ്ധിമുട്ടിയിരുന്നു. രാത്രിയില് വെളിച്ചത്തിന് മണ്ണെണ്ണ വിളക്ക് മാത്രമായിരുന്നു ആശ്രയം. മൊബൈല് ഉള്പ്പെടെ
ചാര്ജ് ചെയ്യാന് കിലോമീറ്ററുകള് സഞ്ചരിക്കണം. ദ്രൗപതി മുര്മു ഇപ്പോള് ഇവിടെയല്ല താമസം. ഇരുപതോളം കിലോമീറ്റര് അകലെയുളള റായ്റംഗപൂരിലേക്ക് അവര് മാറിയിരുന്നു.
ദ്രൗപതി മുര്മുവിന്റെ ബന്ധു ബിറാഞ്ചി നാരായണ് ടുഡുവും കുടുംബവും ഇപ്പോഴും ദുംഗൂര്സാഹിയില് താമസിക്കുന്നുണ്ട്. ദ്രൗപതി മുര്മു രാഷ്ട്രപതി സ്ഥാനാര്ത്ഥിയായതുകൊണ്ടല്ല പ്രദേശവാസികളുടെ സമരങ്ങളുടെ കൂടി പശ്ചാത്തലത്തിലാണ് വൈദ്യുതി നല്കാന് അധികൃതര് തീരുമാനിച്ചത്. ട്രാന്സ്ഫോര്മറുകളും പോസ്റ്റുകളും നാട്ടാനുളള ജോലികള് ടാറ്റ പവര് നോര്ത്ത് ഒഡീഷ ഡിസ്ട്രിബ്യൂഷന് ലിമിറ്റഡ് തുടങ്ങിക്കഴിഞ്ഞു.
തങ്ങളുടെ നാട്ടില് നിന്ന് ഒരാള് രാജ്യത്തെ പ്രഥമ പൗരയാകുന്നതോടെ വൈദ്യുതിക്ക് പുറമേ അടിസ്ഥാന സൗകര്യ വികസനത്തിലുള്പ്പെടെ വലിയ മാറ്റം വരുമെന്ന പ്രതീക്ഷകളാണ് ഗ്രാമവാസികള് പങ്കുവെയ്ക്കുന്നത്.
Comments