പ്രധാനമന്ത്രിയുടെ പിന്നാലെ ചെന്ന് ബൈഡൻ; ചുമലിൽ തട്ടി വിളിച്ച് ഹസ്തദാനം; ലഘു സംഭാഷണം നടത്തി ലോക നേതാക്കൾ (വീഡിയോ)

മ്യൂണിക്: ജർമ്മനിയിലെ സ്ലോസ്സ് എൽമൗവിൽ നടക്കുന്ന ജി-7 ഉച്ചകോടിക്കിടെ പ്രധാനമന്ത്രി നരേന്ദ്ര മോദിയെ പിറകേ വിളിച്ച് ഹസ്തദാനം ചെയ്ത് അമേരിക്കൻ പ്രസിഡന്റ് ജോ ബൈഡൻ. മറ്റ് ലോകനേതാക്കൾക്കൊപ്പം പ്ലാറ്റ്ഫോമിൽ നിന്നും താഴേക്കിറങ്ങിയ പ്രധാനമന്ത്രിയെ പിന്നിൽ നിന്നും ചുമലിൽ തട്ടി വിളിച്ച ശേഷം ഹസ്തദാനം ചെയ്യുന്ന ബൈഡന്റെ വീഡിയോ ദേശീയ മാദ്ധ്യമങ്ങൾ പുറത്തു വിട്ടു. ഹസ്തദാനത്തിന് ശേഷം ഇരു നേതാക്കളും അൽപ്പനേരം ലഘുസംഭാഷണത്തിൽ ഏർപ്പെടുകയും ചെയ്തു. മോദിയും ബൈഡനും തമ്മിലുള്ള സംഭാഷണം സാകൂതം വീക്ഷിക്കുന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയെയും വീഡിയോയിൽ കാണാം.

#WATCH | US President Joe Biden walked up to Prime Minister Narendra Modi to greet him ahead of the G7 Summit at Schloss Elmau in Germany.

(Source: Reuters) pic.twitter.com/gkZisfe6sl

— ANI (@ANI) June 27, 2022

ബൈഡനുമായി സംസാരിക്കുന്നതിന് മുൻപ്, ജസ്റ്റിൻ ട്രൂഡോയുമായും ഫ്രഞ്ച് പ്രസിഡന്റ് ഇമ്മാനുവൽ മക്രോണുമായും പ്രധാനമന്ത്രി സംഭാഷണം നടത്തിയിരുന്നു. തുടർന്ന്, നേതാക്കൾ ഗ്രൂപ്പ് ഫോട്ടോയ്‌ക്ക് പോസ് ചെയ്തു.

ജി-7 ഉച്ചകോടിയിൽ പങ്കെടുക്കുന്നതിന്റെ ഭാഗമായി ജർമ്മനിയിൽ എത്തിയ പ്രധാനമന്ത്രി നരേന്ദ്ര മോദിയെ കഴിഞ്ഞ ദിവസം ജർമ്മൻ ചാൻസലർ ഒലാഫ് ഷോൾസ് സ്വീകരിച്ചിരുന്നു. ജർമ്മനിയിലെ ഇന്ത്യൻ സമൂഹത്തെ അഭിസംബോധന ചെയ്ത പ്രധാനമന്ത്രിക്ക് വലിയ സ്വീകരണമായിരുന്നു ലഭിച്ചത്.