ഡബ്ലിൻ: അയർലൻഡിനെതിരായ രണ്ടാം ട്വന്റി 20 മത്സരത്തിൽ ഇന്ത്യക്ക് കൂറ്റൻ സ്കോർ. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ 20 ഓവറിൽ 7 വിക്കറ്റ് നഷ്ടത്തിൽ 225 റൺസ് നേടി. സെഞ്ച്വറി നേടിയ ദീപക് ഹൂഡയുടെയും അർദ്ധ സെഞ്ച്വറി നേടിയ മലയാളി താരം സഞ്ജു സാംസണിന്റെയും ബാറ്റിംഗ് മികവാണ് ഇന്ത്യക്ക് മികച്ച സ്കോർ സമ്മാനിച്ചത്.
ദീപക് ഹൂഡ 57 പന്തിൽ 104 റൺസ് നേടി. ഏറെ നാളുകൾക്ക് ശേഷം ഇന്ത്യൻ ടീമിൽ കളിക്കാൻ അവസരം ലഭിച്ച സഞ്ജു മടങ്ങി വരവ് ഗംഭീരമാക്കി. ഐപിഎല്ലിൽ നിർത്തിയിടത്ത് നിന്നും തുടങ്ങിയ സഞ്ജു 42 പന്തിൽ 77 റൺസ് നേടി. ഇഷാൻ കിഷനൊപ്പം സഞ്ജുവാണ് ഇന്ത്യയുടെ ഇന്നിംഗ്സ് ഓപ്പൺ ചെയ്തത്.
അയർലൻഡിന് വേണ്ടി മാർക്ക് അഡെയ്ർ 3 വിക്കറ്റ് വീഴ്‌ത്തി. ജോഷ്വ ലിറ്റിൽ, ക്രെയ്ഗ് യംഗ് എന്നിവർ 2 വിക്കറ്റ് വീതം വീഴ്‌ത്തി.
