ന്യൂഡല്ഹി: വില്ലേജ്, ഗ്രാമപഞ്ചായത്ത് തലത്തില് പ്രവര്ത്തിക്കുന്ന ചെറുകിട സഹകരണ വായ്പ സ്ഥാപനങ്ങളെ (പിഎസിഎസ്) കമ്പ്യൂട്ടര് അധിഷ്ഠിതമാക്കുമെന്ന് കേന്ദ്രം അറിയിച്ചു. ഇതിനായി സാമ്പത്തിക സഹായം ഉള്പ്പെടെ 2,516 കോടി രൂപ അനുവദിച്ചു.6,300 സ്ഥാപനങ്ങളാകും കമ്പ്യൂട്ടര് അധിഷ്ഠിതമാക്കുക. രാജ്യത്തെ 13 കോടി കര്ഷകര്ക്ക് പദ്ധതി ഉപകാരപ്രദമാകും. പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സാമ്പത്തിക കാര്യ ക്യാബിനറ്റ് കമ്മിറ്റി(സിസിഇഎ) ആണ് തീരുമാനം എടുത്തത്.
സഹകരണ വായ്പ സ്ഥാപനങ്ങളുടെ കാര്യക്ഷമത വര്ദ്ധിപ്പിക്കുക , പദ്ധതികളുടെ സുതാര്യതയും ഉത്തരവാദിത്വവും വര്ദ്ധിപ്പിക്കുക തുടങ്ങിയവയാണ് കമ്പ്യൂട്ടര് അധിഷ്ഠിതമാക്കുന്നതിന്റെ ലക്ഷ്യങ്ങള്. ബിസിനസുകള് വൈവിധ്യവത്കരിക്കാനും ഒന്നിലധികം സേവനങ്ങള് ഏറ്റെടുക്കാനും ഇവ സൗകര്യമൊരുക്കുന്നു.
ഇത്തരമൊരു സൗകര്യം വ്യവസായങ്ങളെ വികസിപ്പിക്കുമെന്ന് ആഭ്യന്തര മന്ത്രി അമിത് ഷാ വ്യക്തമാക്കി. നേരിട്ടുള്ള ആനുകൂല്യ കൈമാറ്റം (ഡിബിറ്റി), പലിശ ധനസഹായ പദ്ധതി ( ഐഎസ്എസ്) , വിള ഇന്ഷുറന്സ് പദ്ധതി തുടങ്ങി. പദ്ധതികളില് ഇത്തരം സോഫ്റ്റ് വെയര് വലിയ പങ്ക് വഹിക്കും. പ്രാദേശിക ഭാഷയിലും സോഫ്റ്റ് വെയര് ലഭ്യമാക്കുമെന്നും ഷാ അറിയിച്ചു. ‘സഹകരണത്തിലൂടെയുള്ള അഭിവൃത്തി’യെന്ന മോദിയുടെ ആശയം കേവലമൊരു പ്രസ്താവന മാത്രമല്ല, ജനങ്ങള്ക്കുള്ള പോസിറ്റിവിറ്റി ആണെന്നും അദ്ദേഹം പറഞ്ഞു.
വില്ലേജ്, ഗ്രാമപഞ്ചായത്ത് തലത്തില് പ്രവര്ത്തിക്കുന്ന ഏറ്റവും ചെറിയ സഹകരണ വായ്പ സ്ഥാപനങ്ങളാണ് പിഎസിഎസ്.1904 ല് രൂപീകൃതമായ പിഎസിഎസ് എഴുപതുകളില് ഗ്രാമ പ്രദേശങ്ങളിലെ ഏക ക്രെഡിറ്റ് ഏജന്സി ആയിരുന്നു. കര്ഷകരെ സംരക്ഷിക്കാനും നിക്ഷേപങ്ങള് സ്വീകരിക്കാനും ആവശ്യമുള്ള വായ്പക്കാര്ക്ക് വായ്പ നല്കാനും പ്രോത്സാഹിപ്പിക്കുക എന്നതാണ് ഇവയുടെ ലക്ഷ്യം.
