ഉദയ്പൂര്‍: തങ്ങളുടെ പിതാവിന് ഇസ്ലാമിക തീവ്രവാദികളില്‍ നിന്ന് നിരന്തരം വധഭീഷണി ഉണ്ടായിരുന്നുവെന്ന് ഉദയ്പൂരില്‍ കൊല്ലപ്പെട്ട കനയ്യലാലിന്റെ മക്കള്‍. ഒരു ദേശീയ മാദ്ധ്യമത്തിന് നല്‍കിയ അഭിമുഖത്തിലാണ് കനയ്യലാലിന്റെ മക്കളായ യാഷും തരുണും ഇക്കാര്യം വ്യക്തമാക്കിയത്. തങ്ങളുടെ അച്ഛന് നിരന്തരമായി ഭീഷണി സന്ദേശങ്ങള്‍ വന്നിരുന്നു ഇതിനെക്കുറിച്ച് പോലീസിലും പരാതി നല്‍കി. എന്നാല്‍ പരാതിയിന്മേല്‍ പോലീസ് യാതൊരു നടപടിയും സ്വീകരിച്ചില്ലെന്നും ഇവര്‍ ആരോപിച്ചു.
പോലീസ് കൃത്യമായി നടപടി സ്വീകരിച്ചിരുന്നുവെങ്കില്‍ തങ്ങളുടെ പിതാവ് ഇപ്പോഴും ജീവിച്ചിരിക്കുമായിരുന്നു. സമൂഹമാദ്ധ്യമത്തില്‍ കമന്റ് ഇട്ടതിന്റെ പേരില്‍ അദ്ദേഹത്തെ അറസ്റ്റ് ചെയ്തിരുന്നു. പിന്നീട് ജാമ്യം നേടി. ഒത്തുതീര്‍പ്പ് ചര്‍ച്ചയ്‌ക്കിടയില്‍ അദ്ദേഹം മാപ്പ് പറയുകയും ചെയ്തിരുന്നു. എന്നാല്‍ അതിന് ശേഷവും അദ്ദേഹത്തിന് നിരവധി ഭീഷണി സന്ദേശങ്ങള്‍ വന്നിരുന്നു. ഇത് ചൂണ്ടിക്കാണിച്ച് നിരവധി തവണയാണ് പോലീസിനെ സമീപിച്ചത്. എന്നാല്‍ പോലീസ് ഒരു നടപടിയും സ്വീകരിച്ചില്ല. കൃത്യമായി നടപടി സ്വീകരിച്ചിരുന്നെങ്കില്‍ അച്ഛന് ഇപ്പോഴും ജീവിച്ചിരിക്കുമായിരുന്നു.
ഭീഷണി സന്ദേശങ്ങള്‍ കാരണം പലപ്പോഴും കട അടച്ചിട്ടിരുന്നു. ഒരാള്‍ കടയില്‍ നേരിട്ടെത്തി ഭീഷണിപ്പെടുത്തിയിരുന്നുവെന്നും കനയ്യലാലിന്റെ മക്കള്‍ പറഞ്ഞു. തങ്ങള്‍ വിദ്യാര്‍ത്ഥികളാണ്. കുടുംബത്തിന്റെ ഏക വരുമാനമായിരുന്നു അദ്ദേഹം. കുറ്റക്കാരായ പ്രതികള്‍ക്ക് വധശിക്ഷ നല്‍കണമെന്നും യാഷും തരുണും ആവശ്യപ്പെട്ടു. നിലവില്‍ എന്‍ഐഎ പ്രതികള്‍ക്കെതിരെ യുഎപിഎ പ്രകാരം കേസെടുത്തിട്ടുണ്ട്. കൊലപാതകം, അതിക്രമിച്ചു കയറല്‍, മതസ്പര്‍ധ വളര്‍ത്തല്‍ തുടങ്ങിയ വകുപ്പുകളും ചുമത്തിയിട്ടുണ്ട്.
