കോംഗോ: കോംഗോയില് തീവ്രവാദികളുടെ നേതൃത്വത്തില് മനുഷ്യാവകാശ ധ്വംസനങ്ങള് വര്ദ്ധിക്കുന്നതായി പരാതി. കോംഗോയില് നിന്നുള്ള യുവതിയുടെ ദാരുണ അനുഭവമാണ് ഇവിടെ നിന്നുള്ള ഒരു മനുഷ്യാവകാശ സംഘടന യുഎന് സെക്യൂരിറ്റി കൗണ്സിലില് തുറന്നു പറഞ്ഞത്. കോംഗോ സ്വദേശിനിയായ യുവതിയെ രണ്ട് തവണയാണ് ഭീകരര് തട്ടിക്കൊണ്ടുപോയി കൂട്ട ബലാത്സംഗത്തിന് ഇരയാക്കിയത്, ഇതിന് പുറമെ മനുഷ്യമാംസം പാകം ചെയ്യാനും ഭീകരര് ഈ യുവതിയെ നിര്ബന്ധിച്ചതായി മനുഷ്യാവകാശ പ്രവര്ത്തകര് പറയുന്നു.
മെയ് അവസാനം മുതല് കോംഗോയില് സര്ക്കാരും വിമത ഗ്രൂപ്പുകളും തമ്മിലുള്ള തര്ക്കം രൂക്ഷമാണ്. വിഷയത്തില് യുഎന്നില് നടത്തിയ ചര്ച്ചയ്ക്കിടെയാണ് തുറന്നു പറച്ചില്. കോഡെകോ തീവ്രവാദികളാണ് ആദ്യം ഈ യുവതിയെ തട്ടിക്കൊണ്ടു പോയതെന്ന് സ്ത്രീകളുടെ ഉന്നമനത്തിനായി പ്രവര്ത്തിക്കുന്ന സംഘടനയിലെ അംഗമായ ജൂലിയന് ലുസെഞ്ച് പറഞ്ഞു. ഈ ഭീകരര് യുവതിയെ തുടര്ച്ചയായി പീഡനത്തിന് ഇരയാക്കി. ഇതിന് പുറമെ ഭീകരര് മറ്റൊരാളെ വധിക്കുന്നതിനും യുവതി സാക്ഷിയായി.
ഇതിന് ശേഷം കൊലപ്പെടുത്തിയ ആളിന്റെ കുടല് ഭീകരര് പുറത്തെടുത്തു. ഇത് പാകം ചെയ്ത് നല്കണമെന്നായിരുന്നു യുവതിക്ക് കിട്ടിയ നിര്ദ്ദേശം. ഭീകരരുടെ തടവിലുള്ളവര്ക്കെല്ലാം ഈ മനുഷ്യമാംസം പാകം ചെയ്തതാണ് നല്കിയത്. മനുഷ്യമാംസം കഴിക്കാനും ഇവര് നിര്ബന്ധിച്ചു. കുറച്ച് ദിവസങ്ങള്ക്കുള്ളില് ഇവിടെ നിന്ന് മോചിപ്പിക്കപ്പെട്ടെങ്കിലും മറ്റൊരു സംഘം തീവ്രവാദികള് ഇവരെ വീണ്ടും തട്ടിക്കൊണ്ടു പോവുകയും ബലാത്സംഗത്തിന് ഇരയാക്കുകയും ചെയ്തു. ഇവിടെ വച്ചും സമാനമായ രീതിയില് ഈ യുവതിക്ക് മനുഷ്യമാംസം പാകം ചെയ്യേണ്ടി വന്നുവെന്നും ലുസെഞ്ച് ആരോപിച്ചു. എന്നാല് രണ്ടാമത്തെ തീവ്രവാദ സംഘടനയുടെ പേര് ഇവര് വ്യക്തമാക്കിയില്ല. 20 വര്ഷത്തിലധികമായി യുഎന്നിന്റെ നേതൃത്വത്തില് കോംഗോയില് മനുഷ്യാവകാശ പ്രവര്ത്തകരെ നിയമിച്ചിട്ടുണ്ട്.
Comments