തിരുവനന്തപുരം: എകെജി സെന്ററിന് നേരെ ആക്രമണം നടത്തിയത് കോൺഗ്രസല്ലെന്ന് പ്രതിപക്ഷ നേതാവ് വി.ഡി സതീശൻ. നിലവിലെ പ്രതിപക്ഷ സമരങ്ങളിൽ നിന്ന് ശ്രദ്ധ തിരിച്ചുവിടണമെന്നാഗ്രഹിക്കുന്നവരാണ് സംഭവത്തിന് പിന്നിൽ. എകെജി സെന്ററിന് നേരെ പടക്കം എറിഞ്ഞ സംഭവത്തെ ശക്തമായി അപലപിക്കുന്നുവെന്നും അദ്ദേഹം വ്യക്തമാക്കി.
എകെജി സെന്ററിന് നേരെ പടക്കം എറിഞ്ഞ സംഭവത്തെ ശക്തമായി അപലപിക്കുന്നു. കോൺഗ്രസ് ഒരിക്കലും ഇത്തരം പ്രവർത്തനങ്ങൾക്ക് അനുകൂലമായ നിലപാട് സ്വീകരിക്കാറില്ല. സംഭവത്തിൽ പോലീസ് അന്വേഷണം നടക്കട്ടെ. ആരാണ് കുറ്റക്കാരെന്ന് പോലീസ് കണ്ടുപിടിക്കട്ടെ. രാഹുൽഗാന്ധിയുടെ സന്ദർശനം നടക്കുന്ന ദിവസമാണ് ഇന്ന്. അതുകൊണ്ട് എന്തായാലും കോൺഗ്രസ് ഇത്തരമൊരു പ്രവൃത്തി ചെയ്യില്ലെന്ന് എല്ലാവർക്കും അറിയാമെന്നും സതീശൻ പറഞ്ഞു.
കോൺഗ്രസ് നടത്തുന്ന പ്രതിഷേധ സമരത്തിൽ സർക്കാർ പ്രതിരോധത്തിലാണ്. ഇതിൽ നിന്നെല്ലാം ശ്രദ്ധ തിരിക്കാൻ കോൺഗ്രസിന് താത്പര്യമില്ല. ഇതിനായി ആഗ്രഹിക്കുന്നവരാണ് ആക്രമണത്തിന് പിന്നിൽ എന്ന കാര്യത്തിൽ യാതൊരു സംശയവും ഇല്ല. എന്ത് തെളിവിന്റെ അടിസ്ഥാനത്തിലാണ് ആക്രമണത്തിന് പിന്നിൽ കോൺഗ്രസ് ആണെന്ന് അവർ പറയുന്നത്. വെറുതെ പറയുകയാണ്. നേരത്തെ തയ്യാറാക്കിവെച്ച പ്രസ്താവനകളാണ് സിപിഎമ്മിന്റേതെന്നും സതീശൻ പ്രതികരിച്ചു.
